സംസ്ഥാനത്ത് അടുത്ത 4 ദിവസം ഇടിമിന്നലോട് കൂടിയ മഴ തുടരാന്‍ സാധ്യതയെന്ന് കേന്ദ്രകാലാവസ്ഥ വകുപ്പ്. അടുത്ത 3 മണിക്കൂറില്‍ കേരളത്തിലെ കാസര്‍കോഡ് ജില്ലയില്‍ ഒറ്റപ്പെട്ടയിടങ്ങളില്‍ ശക്തമായ മഴയ്ക്ക് സാധ്യതയുണ്ട്. മണിക്കൂറില്‍ 40 കിമീ വേഗതയില്‍ വീശിയടിക്കാവുന്ന കാറ്റിനും സാധ്യതയുണ്ട്. അതേസമയം ബിപര്‍ജോയ് ചുഴലിക്കാറ്റ് ഇന്ന് ഗുജറാത്ത് തീരം തൊടും.
വടക്ക് കിഴക്കന്‍ അറബിക്കടലിന് മുകളില്‍ അതിതീവ്ര ചുഴലിക്കാറ്റായി ജാഖു പോര്‍ട്ടിന് 180 കിലോമീറ്റര്‍ അകലെയാണ് നിലവില്‍ ബിപര്‍ജോയ് ഉള്ളത്. വടക്ക് കിഴക്ക് ദിശയില്‍ സൗരാഷ്ട്ര കച്ചിനോട് ചേര്‍ന്നുള്ള പാകിസ്ഥാന്‍ തീരത്ത് മാണ്ഡാവിക്കും ഗുജറാത്തിലെ ജാഖു പോര്‍ട്ടിന് സമീപം ഇന്ന് വൈകുന്നേരത്തോടെ ബിപര്‍ജോയ് ചുഴലിക്കാറ്റ് എത്തുമെന്നാണ് കേന്ദ്രകാലാവസ്ഥ വകുപ്പ് പ്രവചിക്കുന്നത്. മണിക്കൂറില്‍ 140 കിമീ വേഗതയില്‍ അതിതീവ്രചുഴലിക്കാറ്റായാണ് ബിപര്‍ജോയ് കരയില്‍ പ്രവേശിക്കാന്‍ സാധ്യതയെന്ന് കേന്ദ്രകാലാവസ്ഥ വകുപ്പ് മുന്നറിയിപ്പ് നല്‍കി.
ഗുജറാത്തിലെ കച്ച്, ദേവഭൂമി,ദ്വാരക,ജാം നഗര്‍ എന്നീ ജില്ലകളെയാകും ചുഴലിക്കാറ്റ് ഏറ്റവുമധികം ബാധിക്കുക. ഇതുവരെ അരലക്ഷത്തോളം പേരെ വിവിധ ഭാഗങ്ങളിലേക്ക് മാറ്റിപ്പാര്‍പ്പിച്ചു. ജനങ്ങളോട് പരമാവധി വീടുകളില്‍ തന്നെ കഴിയാന്‍ സര്‍ക്കാര്‍ നിര്‍ദേശം നല്‍കി. ബീച്ചുകളും തുറമുഖങ്ങളും എല്ലാം തന്നെ അടച്ചു. മോശം കാലാവസ്ഥയെ തുടര്‍ന്ന് ഇന്ന് ട്രെയിനുകളും റദ്ദാക്കിയിട്ടുണ്ട്.