മാര്‍ക്കറ്റില്‍ പോയി മടങ്ങുകയായിരുന്ന യുവതിയെ അജ്ഞാതന്‍ കുത്തിക്കൊലപ്പെടുത്തി. സൗത്ത് ദില്ലി ത്യാഗരാജ സ്റ്റേഡിയത്തിന് പുറത്തായിരുന്നു ഈ ഞെട്ടിക്കുന്ന സംഭവമുണ്ടായത്. നാലുവയസുകാരനായ മകന്‍ നോക്കി നില്‍ക്കെയാണ് യുവതിയെ അജ്ഞാതന്‍ കുത്തിക്കൊലപ്പെടുത്തിയത്.
പ്രേം നഗര്‍ കോളനിയില്‍ താമസിക്കുന്ന സന്തോഷി ആണ് കൊല്ലപ്പെട്ടതെന്ന് പൊലീസ് പറഞ്ഞു. നാല്‍പതുകാരിയായ ഇവര്‍ക്ക് അഞ്ച് മക്കളുണ്ട്. നാലുവയസുള്ള ഇളയമകനുമൊത്ത് ചന്തയില്‍ പോയി മടങ്ങവെയാണ് സംഭവം നടന്നത്. സംഭവത്തിന്റെ ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്.
സന്തോഷിയുടെ അലര്‍ച്ചകേട്ട് സ്‌റ്റേഡിയത്തിലെ മൂന്ന് സെക്യൂരിറ്റി ജീവനക്കാര്‍ ഓടിയെത്തുമ്പോഴേക്കും അക്രമി രക്ഷപ്പെട്ടിരുന്നു. തുടര്‍ന്ന് പൊലിസ് സ്ഥലത്തെത്തി യുവതിയെ ആശുപത്രിയിലെത്തിച്ചു. അപ്പോഴേക്കും യുവതി മരിച്ചിരുന്നു. അഞ്ചു കുത്തുകളെങ്കിലും യുവതിയുടെ ശരീരത്തിലുണ്ടെന്ന് ഡോക്ടര്‍മാര്‍ പറഞ്ഞു. സംഭവത്തില്‍ പൊലീസ് അന്വേഷണം തുടങ്ങി.