ഇരുപതാം നൂറ്റാണ്ടില്‍ മോഹന്‍ലാല്‍ പറയുന്ന ‘നാർക്കോട്ടിക്‍സ് ഇസ് എ ഡേർട്ടി ബിസിനസ്’ എന്ന ഡയലോഗിന് കഴിഞ്ഞ വര്‍ഷം പുറത്തിറങ്ങിയ ലൂസിഫര്‍ പോലും അര്‍ഹിക്കുന്ന ആദരം നല്‍കുന്നതിന് മലയാളികള്‍ സാക്‍ഷ്യം വഹിച്ചു. ആ സിനിമയും മോഹന്ലാലിന്റെ കഥാപാത്രവും മലയാളത്തിലെ ത്രില്ലര്‍ ആരാധകരില്‍ ഉണര്‍ത്തിയ ആവേശം അത്രയും വലുതാണ്.
യഥാര്‍ത്ഥത്തില്‍ ‘സണ്‍‌ഡേ’ മാഗസിനില്‍ അച്ചടിച്ചുവന്ന ഒരു ചിത്രമാണ് എസ് എന്‍ സ്വാമിക്ക് ഇരുപതാം നൂറ്റാണ്ടിനുള്ള സ്പാര്‍ക്ക് ആയി മാറിയത്. ബോളിവുഡ് സൂപ്പര്‍സ്റ്റാര്‍ ദിലീപ് കുമാര്‍ അധോലോകനായകനായ ഹാജി മസ്‌താന്‍റെ കാല്‍‌തൊട്ട് തൊഴുന്നതായിരുന്നു ആ ഫോട്ടോ. അതില്‍ നിന്നുണ്ടായ തോന്നലുകളാണ് ഇരുപതാം നൂറ്റാണ്ടിന്‍റെ ജനനത്തിന് കാരണമായത്. ഈ പ്രൊജക്‍ട് എഴുതാനുള്ള അവസരം ആദ്യം എത്തിയത് അക്കാലത്തെ സൂപ്പര്‍ തിരക്കഥാകൃത്തായ ഡെന്നിസ് ജോസഫിന് മുന്നിലായിരുന്നു. എന്നാല്‍ ഡെന്നിസിന്‍റെ തിരക്കുകാരണം, ഡെന്നിസ് തന്നെയാണ് ചിത്രത്തിന് തിരക്കഥ രചിക്കാന്‍ എസ് എന്‍ സ്വാമിയോട് അഭ്യര്‍ത്ഥിക്കുന്നത്.
