നടിയെ ആക്രമിച്ച കേസില്‍ ഗൂഢാലോചന നടത്തിയ സംഭവത്തില്‍ ആലുവ സബ്ജയിലില്‍ റിമാന്‍ഡില്‍ കഴിയുന്ന നടന്‍ ദിലീപിനെ ബന്ധുക്കള്‍ക്ക് മാത്രമെ സന്ദര്‍ശിക്കാന്‍ അനുവാദമുള്ളു എന്നിരിക്കെ അന്വേഷണ സംഘത്തിന്റെ അനുവാദമില്ലാതെ ഇരട്ടക്കൊലപാതകക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന ആള്‍ ദിലീപിനെ സന്ദര്‍ശിച്ചത്. ജയില്‍ നിയമം മറികടന്ന് സൂപ്രണ്ടിന്റെ ഒത്താശയോടെയാണ് ഇയാള്‍ ദിലീപിനെ സന്ദര്‍ശിച്ചത്. ഞായറാഴ്ച വൈകിട്ടായിരുന്നു സംഭവം.
ദിലീപിന്റെ സുഹൃത്ത് കൂടിയായ ഇയാള്‍ എന്തിനാണ് ദിലീപിനെ സന്ദര്‍ശിച്ചതെന്ന് അന്വേഷിക്കുമെന്ന് എറണാകുളം റൂറല്‍ എസ്പി എ വി ജോര്‍ജ്ജ് അറിയിച്ചു. ദിലീപിനെ കാണാന്‍ അദ്ദേഹത്തിന്റെ കുടുംബത്തിന് മാത്രമേ അനുവാദമുള്ളു. ഈ സാഹചര്യത്തില്‍ ഇരട്ടക്കൊലപാതകക്കേസിലെ പ്രതി ദിലീപിനെ കാണാന്‍ എത്തിയത് പൊലീസിന് തിരിച്ചടിയായിരിക്കുകയാണ്. കേസ് അട്ടിമറിക്കപ്പെടുമോ എന്ന് ചില സംശയങ്ങള്‍ ഇപ്പോഴും നിലനില്‍ക്കുന്നത് തന്നെയാണ് ഇതിന് കാരണം.
അതേസമയം, ദിലീപുമായി പള്‍സര്‍ സുനിക്കുണ്ടായിരുന്ന പങ്കിന്റെ കൂടുതല്‍ വിവരങ്ങള്‍ ശേഖരിക്കാന്‍ ഒരുങ്ങുകയാണ് പൊലീസ്. അടൂര്‍ ഗോപാലകൃഷ്ണന്‍ സംവിധാനം ചെയ്ത ‘പിന്നെയും’ എന്ന ചിത്രത്തിന്റെ സെറ്റിലും സുനി എത്തിയതായ് പൊലീസിന് സൂചന ലഭിച്ചു. കാവ്യയും ദിലീപും ഒരുമിച്ചഭിനയിച്ച ചിത്രമാണ് ഇത്. ചിത്രവുമായി സഹകരിച്ചവരുടെ സഹായം തേടാന്‍ തയ്യാറാവുകയാണ് പൊലീസ്.