മട്ടണ്‍ ബിരിയാണി ലഭിച്ചില്ലെന്നാരോപിച്ച് ഹോട്ടല്‍ ജീവനക്കാരനെ മര്‍ദ്ദിച്ച സീരിയല്‍ നടി ഉള്‍പ്പെടെയുള്ള സംഘത്തെ പൊലീസ് അറസ്‌റ്റ് ചെയ്‌തു.
കഴിഞ്ഞ ദിവസം വൈകുന്നേരം അഞ്ചോടെ കോഴിക്കോട് റഹ്മത്ത് ഹോട്ടലിലാണ് അരമണിക്കുറോളം നീണ്ടുനിന്ന സംഭവവികാസങ്ങള്‍ അരങ്ങേറിയത്. അനുവും സംഘവും ഹോട്ടല്‍ ജീവനക്കാരനോട് മട്ടന്‍ ബിരിയാണി ആവശ്യപ്പെട്ടുവെങ്കിലും തീര്‍ന്നുപോയെന്ന് ഇയാള്‍ അറിയിച്ചതോടെയാണ് വാക്കുതര്‍ക്കവും തുടര്‍ന്ന് സംഘര്‍ഷവും ഉണ്ടായത്.
ഹോട്ടല്‍ ജീവനക്കാരനോട് ക്ഷോഭിച്ച അനുവും മുനീസയും ഇയാളെ മര്‍ദ്ദിക്കുകയായിരുന്നു. ഭക്ഷണം കഴിക്കാന്‍ എത്തിയവര്‍ വിഷയത്തില്‍ ഇടപെടാന്‍ ശ്രമിച്ചെങ്കിലും നടിയും സംഘവും ഇവരോട് തട്ടിക്കയറുകയും അസഭ്യം പറയുകയും ചെയ്‌തു. ഇതോടെ ഹോട്ടല്‍ അധികൃതര്‍ പൊലീസില്‍ വിവരമറിക്കുകയായിരുന്നു.
നടിയുള്‍പ്പെടയുള്ളവരെ അറസ്‌റ്റ് ചെയ്‌തു ജാമ്യത്തില്‍ വിട്ടയച്ചു. ഇവരില്‍ ഒരാള്‍ മദ്യപിച്ചിരുന്നതായി പൊലീസ് അറിയിച്ചു.