കൊച്ചിയില്‍ ആക്രമിക്കപ്പെട്ട നടിക്കെതിരെ നടത്തിയ പരാമര്‍ശത്തില്‍ താന്‍ ഉറച്ചു നില്‍ക്കുന്നുവെന്ന് പിസി ജോര്‍ജ് എം‌എല്‍‌എ. തനിക്കെതിരെ പി സി. ജോർജ് അടക്കമുള്ളവര്‍ നിരന്തരമായി നടത്തുന്ന അപകീർത്തികരമായ പ്രസ്താവനകൾക്കെതിരെ നടി കഴിഞ്ഞ ദിവസം മുഖ്യമന്ത്രിക്ക് പരാതി നല്‍കിയിരുന്നു. ഇതിനു പിന്നാലെയാണ് നിലപാടു കടുപ്പിച്ച് ജോര്‍ജ് രംഗത്തെത്തിയിരിക്കുന്നത്. നടിയുടെ പരാതിയെ താൻ ഭയപ്പെടുന്നില്ലെന്നാണ് കോട്ടയത്ത് മാധ്യമപ്രവർത്തകരോട് സംസാരിക്കവെ പി.സി പറഞ്ഞത്.
തനിക്കെതിരെ കത്തല്ല എന്ത് കുന്തം കൊടുത്താലും ഇനി പിന്നോട്ടില്ല. നടി നല്‍കിയ പരാതിയോടെ ദിലീപ് നിരപരാധിയെന്ന് തെളിഞ്ഞിരിക്കുകയാണ്. അന്വേഷണം ശരിയായ ദിശയിലല്ല മുന്നോട്ട് പോകുന്നതെന്നതിന്റെ തെളിവുകൂടിയാണ് അത്. ഈ കേസില്‍ ദിലീപ് നിരപരാധിയാണെന്നും പിസി പറഞ്ഞു. പള്‍സര്‍ സുനി പറയുന്നത് വിശ്വസിക്കേണ്ട കാര്യമില്ല. സുനി പിണറായി വിജയന്റെ പേരു പറഞ്ഞാല്‍ അദ്ദേഹത്തെ അറസ്റ്റ് ചെയ്യുമോയെന്നും പിസി ചോദിച്ചു.
വനിതാ കമ്മീഷന്റെ തലപ്പത്തും യോഗ്യതയുളളവരാണ് വരേണ്ടത്. അവരുടെ പരാതിയെയെയും തനിക്ക് ഭയമില്ലെന്നും പിസി ജോര്‍ജ് പറഞ്ഞു. ആക്രമണത്തിന് ഇരയാക്കപ്പെട്ട നടി ആരാണെന്ന് തനിക്കറിയില്ല. തനിക്ക് ആകെ അറിയാവുന്നത് പൊലീസ് പറഞ്ഞ ഇരയെ മാത്രമാണ്. നടി ആരെന്ന് അറിയാതെ നടിയെപ്പറ്റി ആക്ഷേപമുന്നയിക്കുന്നത് എങ്ങനെയാണ്. ഏതെങ്കിലുമൊരു നടി പരാതി നൽകിയെന്നു പറഞ്ഞാല്‍ അവരെങ്ങനെയാണ് ഇരയാകുന്നതെന്നും പിസി ചോദിച്ചു.