എകെജിക്കെതിരെ വിവാദ പരാമര്‍ശം നടത്തിയ വി.ടി. ബല്‍റാം എം.എല്‍.എ.യ്ക്ക് യു.ഡി.എഫിന്റെ പൂര്‍ണപിന്തുണയുണ്ടെന്ന് പ്രതിപക്ഷനേതാവ് രമേശ് ചെന്നിത്തല. മാപ്പുപറയണോ തെറ്റുതിരുത്തണോ എന്ന വിഷയം ബല്‍റാമോ യു.ഡി.എഫോ ആലോചിച്ചിട്ടില്ലെന്നും മാധ്യമങ്ങളോട് സംസാരിക്കവെ അദ്ദേഹം പറഞ്ഞു.
ഈ സംഭവത്തിനുശേഷം എത്രയോ പ്രകോപനപരമായ തരത്തിലുള്ള പ്രവര്‍ത്തനങ്ങള്‍ സി.പി.എം. നടത്തി. രാഹുല്‍ഗാന്ധിയെവരെ കളിയാക്കിയാണ് അച്യുതാനന്ദന്‍ ലേഖനമെഴുതിയത്. ഇതേപ്പറ്റിയൊന്നും യു.ഡി.എഫ്. ഒരുതരത്തിലുള്ള പ്രതികരണവും നടത്തിയിട്ടില്ലെന്നും അദ്ദേഹം പറഞ്ഞു.
കേരളത്തിലെ ഒരു എംഎല്‍എയ്ക്ക് സഞ്ചാരസ്വാതന്ത്ര്യം നിഷേധിക്കാനാ‍ണോ മുഖ്യമന്ത്രി തയ്യാറാവുന്നതെന്നാണ് അദ്ദേഹത്തോട് ചോദിക്കാനുള്ളതെന്നും വി.ടി. ബല്‍റാം വിഷയത്തില്‍ യു.ഡി.എഫ് ഒരുതരത്തിലുള്ള വിട്ടുവീഴ്ചയ്ക്കും തയ്യാറാവുമെന്ന് സി.പി.എം കരുതേണ്ടെന്നും ചെന്നിത്തല കൂട്ടിച്ചേര്‍ത്തു.