തിരുവനന്തപുരം: പാലക്കാട് ജില്ലയില്‍ റിപ്പോര്‍ട്ട് ചെയ്ത രണ്ടാമത്തെ നിപ കേസുമായി ബന്ധപ്പെട്ട് 112 പേരെ സമ്പര്‍ക്കപ്പട്ടികയില്‍ ഉള്‍പ്പെടുത്തിയതായി ആരോഗ്യ മന്ത്രി വീണാ ജോര്‍ജ് അറിയിച്ചു. സിസിടിവി ദൃശ്യങ്ങള്‍ ഉള്‍പ്പെടെ ശേഖരിച്ച വിവരങ്ങളുടെ അടിസ്ഥാനത്തില്‍ റൂട്ട് മാപ്പ് തയ്യാറാക്കി, പ്രദേശത്ത് കണ്ടെയിന്‍മെന്റ് സോണ്‍ പ്രഖ്യാപിച്ച് ഫീല്‍ഡ് തല പ്രവര്‍ത്തനങ്ങളും സര്‍വെയലന്‍സും ശക്തമാക്കിയിരിക്കുകയാണ്.
ആകെ 609 പേരാണ് വിവിധ ജില്ലകളില്‍നിന്നുള്ള സമ്പര്‍ക്കപ്പട്ടികയില്‍ ഉള്ളത്. ഇതില്‍ പാലക്കാട് ജില്ലയില്‍ മാത്രം 286 പേര്‍ ഉള്‍പ്പെടുന്നു. നിപ സ്ഥിരീകരിച്ച രണ്ടാമത്തെ രോഗിയുമായി നേരിട്ട് ബന്ധപ്പെട്ട 112 പേരാണ് ഇവിടെ നിരീക്ഷണത്തില്‍. മറ്റ് ജില്ലകളിലെ എണ്ണം ഇങ്ങനെ: മലപ്പുറം - 207 പേര്‍, കോഴിക്കോട് - 114 പേര്‍, എറണാകുളം - 2 പേര്‍.
നിപ വ്യാപനം ചെറുക്കുന്നതിനായി ആരോഗ്യ വകുപ്പ് മന്ത്രി വീണാ ജോര്‍ജിന്റെ നേതൃത്വത്തില്‍ ഉന്നതതല യോഗം ചേര്‍ന്നു. യോഗത്തില്‍ ആരോഗ്യ വകുപ്പിന്റെ വിവിധ ഉന്നത ഉദ്യോഗസ്ഥരും ജില്ലാ കളക്ടര്‍മാരും, പോലീസ് ഉദ്യോഗസ്ഥരുമടക്കമുള്ളവര്‍ പങ്കെടുത്തു.
