കല്യാണം കഴിച്ചെന്നു തെറ്റിദ്ധരിപ്പിച്ച് മാനസികാസ്വാസ്ഥ്യമുള്ള യുവതിയെ പീഡനത്തിനിരയാക്കിയ കേസില്‍ യുവാവ് പൊലീസ് പിടിയില്‍. മട്ടാഞ്ചേരി പാണ്ടിക്കുടി കേമ്പിരി റോഡില്‍ താമസിക്കുന്ന യുവതിയെയാണ് ഇയാള്‍ അമ്പലത്തില്‍ കൊണ്ടുപോയി മാലയിട്ട് കല്യാണം കഴിച്ചെന്നു വരുത്തി പീഡനത്തിനിരയാക്കിയത്.
യുവതിയുടെ പിതാവിന്റെ മരണശേഷം രക്ഷകന്‍ ചമഞ്ഞ് ഇയാള്‍ അടുത്തുകൂടുകയായിരുന്നു. മദ്യവും മറ്റു ലഹരിവസ്തുക്കളും നല്‍കി ഇയാള്‍ യുവതിയെ ശാരീരികമായി പീഡനത്തിനിരയാക്കുകയായിരുന്നു.
യുവതിയെ മാനസികാസ്വാസ്ഥ്യത്തിനു ചികില്‍സിക്കാതെയും ഇയാള്‍ പീഡനം തുടര്‍ന്നു. യുവതിയുടെ വീട് പണയപ്പെടുത്തി ലഭിച്ച തുകയും ഇയാള്‍ ധൂര്‍ത്തടിച്ചു. മാനസികാസ്വാസ്ഥ്യത്തെ തുടര്‍ന്ന് ആദ്യഭര്‍ത്താവ് യുവതിയെ ഉപേക്ഷിച്ചിരുന്നു. യുവതിയെ നിയമപരമായി വിവാഹം കഴിച്ചതിന്റെ യാതൊരു തെളിവും പ്രതിയുടെ കൈവശമില്ലായിരുന്നു.
യുവതിയുടെ അമ്മയുടെ പരാതിയെത്തുടര്‍ന്നാണ് കേസെടുത്തത്. യുവതിയും അമ്മയും കാഞ്ഞിരമറ്റത്തുള്ള ഒരു മാനസികരോഗ്യ കേന്ദ്രത്തില്‍ ചികില്‍സയിലാണ്. കുന്ദംകുളം കൊട്ടിലങ്ങല്‍ വീട്ടില്‍ സജ (34)നെയാണ് മട്ടാഞ്ചേരി സര്‍ക്കിള്‍ ഇന്‍സ്‌പെക്ടര്‍ പി വി മണികണ്ഠന്‍, എസ്.ഐ. എം സുധിലാല്‍ എന്നിവരുടെ നേതൃത്വത്തില്‍ അറസ്റ്റ് ചെയ്തത്.