മാസങ്ങളായി മെഡിക്കല്‍ വിദ്യാര്‍ത്ഥിയായി വിലസി നടന്ന യുവാവിനെ പൊലീസ് അറസ്റ്റ് ചെയ്തു. മഞ്ചേരി നെല്ലിക്കുത്ത് തേക്കിന്‍തൊടി ഷിബിന്‍ എന്ന 20 കാരനാണ് സ്റ്റെതസ്കോപ്പും ഓവര്‍ക്കോട്ടുമായി മഞ്ചേരി മെഡിക്കല്‍ കോളേജില്‍ വിലസി നടന്നത്.
ക്ലാസുള്ളപ്പോഴും അല്ലാത്തപ്പോഴും ഇയാള്‍ വാര്‍ഡുകളിലും മറ്റുമായി കറങ്ങി നടക്കുന്നതില്‍ സംശയം ജനിച്ച മെഡിക്കല്‍ കോളേജ് ജീവനക്കാര്‍ ചോദ്യം ചെയ്തപ്പോഴാണ് കള്ളി വെളിച്ചത്തായത്. സാമ്പത്തിക ബുദ്ധിമുട്ട് പറഞ്ഞ് ജീവനക്കാരില്‍ നിന്ന് ഇയാള്‍ അടിക്കടി പണം ചോദിച്ചു വാങ്ങിയതായും അറിവുണ്ട്.
മെഡിക്കല്‍ കോളേജ് ഡെപ്യൂട്ടി സൂപ്രണ്ട് ഡോ.നൂറ മഞ്ചേരി പൊലീസില്‍ പരാതി നല്‍കിയതിനെ തുടര്‍ന്ന് ആള്‍ മാറാട്ടത്തിനു കേസെടുത്താണ് ഇയാളെ അറസ്റ്റ് ചെയ്തത്. അതേ സമയം ഇയാള്‍ക്ക് മാനസിക പ്രശ്നമുണ്ടോ എന്ന് സംശയിക്കുന്നതായും പൊലീസ് പറയുന്നു.