കോഴിക്കോട് നഗരത്തില്‍ കെ എസ് ആര്‍ ടി സി ബസിന് തീ പിടിച്ചു. കെ എസ് ആര്‍ ടി സി സ്റ്റാന്റില്‍ നിന്നും മലപ്പുറത്തേക്ക് പുറപ്പെട്ട ബസ് നിയന്ത്രണം വിട്ട് ഡിവൈഡര്‍ തകര്‍ത്ത് മറുഭാഗത്തു കൂടി സഞ്ചരിക്കുകയായിരുന്ന മൂന്നു ബൈക്കുകളെ ഇടിക്കുകയായിരുന്നു. തുടര്‍ന്ന് ബസിന് തീപിടിച്ചു.
സ്റ്റാന്‍ഡില്‍ നിന്ന് പുറത്തേക്കിറങ്ങിയ ബസിന് നൂറുമീറ്റര്‍ പിന്നിടുന്നതിനു മുമ്പു തന്നെ നിയന്ത്രണം നഷ്‌ടമായി. അപകടത്തില്‍ നാലുപേര്‍ക്ക് പരുക്കേറ്റു. ഒരു ബൈക്ക് പൂര്‍ണമായും തകര്‍ന്നു. സ്വകാര്യ ആശുപത്രിയില്‍ പ്രവേശിപ്പിച്ച ബൈക്ക് യാത്രക്കാരില്‍ ഒരാളുടെ നില ഗുരുതരമാണ്.
ഡിവൈഡറില്‍ ഇടിച്ചപ്പോള്‍ ബസിന്റെ ഡീസല്‍ ടാങ്ക് പൊട്ടിയതാണ് തീപിടിത്തത്തിന് കാരണമായത്. ബസില്‍ നാല് യാത്രക്കാര്‍ മാത്രമേ ഉണ്ടായിരുന്നുള്ളൂ. നാല് യൂണിറ്റ് അഗ്നിശമനസേന സംഭവസ്ഥലത്ത് ഉടന്‍ തന്നെയെത്തി തീയണച്ചു.