കൊട്ടാരക്കരയിൽ യുവഡോക്ടർ വന്ദനയുടെ കൊലപാതകത്തിൽ സമരപരിപാടികൾ ശക്തമാക്കി ഡോക്ടർമാർ. 24 മണിക്കൂർ സമരപരിപാടികളാണ് ഐഎംഎ പ്രഖ്യാപിച്ചിരിക്കുന്നത്. വ്യാഴാഴ്ച 8 മണി വരെയായിരിക്കും സമരം. അത്യാഹിത വിഭാഗങ്ങളെ സമരത്തിൽ നിന്നും ഒഴിവാക്കുമെന്ന് ഐഎംഎ അറിയിച്ചു.
ഇതിന് ശേഷം തുടർ സമരപരിപാടികൾ എങ്ങനെ വേണമെന്ന കാര്യം ഉച്ചയ്ക്ക് ശേഷം ചേരുന്ന യോഗത്തിൽ തീരുമാനിക്കും. സംഭവത്തെ തുടർന്ന് കൂടുതൽ സമരപരിപാടികളിലേക്ക് കടക്കുമെന്ന് തന്നെയാണ് ഡോക്ടർമാർ വ്യക്തമാക്കുന്നത്. ആരോഗ്യപ്രവർത്തകർക്കെതിരെ നിരന്തരമായി ആക്രമണം ഉണ്ടാകുന്ന കാര്യം സ്വീകാര്യമല്ലെന്നും സ്വസ്ഥമായി സ്വതന്ത്ര്യമായി രോഗികളെ ചികിത്സിക്കാനുള്ള ആത്മവിശ്വാസം നഷ്ടപ്പെടുത്തുന്നതാണ് ഇത്തരം സംഭവങ്ങളെന്നും കേരളത്തിൻ്റെ പൊതുമനസാക്ഷി ഈ വികാരം ഉൾകൊണ്ടുകൊണ്ട് സമരത്തെ കാണണമെന്നും ഐഎംഎ സംസ്ഥാന പ്രസിഡൻ്റ് ഡോ സുൽഫി പറഞ്ഞു.