ഫേസ്‌ബുക്കില്‍ മോര്‍ഫ് ചെയ്ത നഗ്‌നഫോട്ടോകള്‍ പ്രചരിക്കപ്പെട്ടതില്‍ മനംനൊന്ത് പെണ്‍കുട്ടി ആത്മഹത്യ ചെയ്തു; മാതാപിതാക്കള്‍ പോലും തന്നെ വിശ്വസിക്കുന്നില്ലെന്ന് ആത്മഹത്യാക്കുറിപ്പില്‍ പെണ്‍കുട്ടി
ഫേസ്‌ബുക്കില്‍ മോര്‍ഫ് ചെയ്ത നഗ്‌നഫോട്ടോകള്‍ പ്രചരിക്കപ്പെട്ടതില്‍ മനംനൊന്ത് പെണ്‍കുട്ടി ആത്മഹത്യ ചെയ്തു. സേലം സ്വദേശിനിയായ അനുപ്രിയ എന്ന 21 കാരിയാണ് ആത്മഹത്യ ചെയ്തത്. കെമിസ്ട്രി ബിരുദധാരിയായ പെണ്‍കുട്ടിയുടെ ഫോട്ടോകള്‍ മറ്റൊരാള്‍ വ്യാജമായി തയ്യാറാക്കി ഫേസ്‌ബുക്കില്‍ പോസ്റ്റ് ചെയ്യുകയായിരുന്നു. ഇതില്‍ മനംനൊന്ത് പെണ്‍കുട്ടി ആത്മഹത്യ ചെയ്യുകയായിരുന്നു.
ആറു ദിവസങ്ങള്‍ക്കു മുമ്പാണ് ഇത്തരത്തിലുള്ള ഫോട്ടോകള്‍ ഫേസ്‌ബുക്കില്‍ പ്രത്യക്ഷപ്പെട്ടത്. മോര്‍ഫ് ചെയ്ത ഫോട്ടോകള്‍ പുറത്തു വന്നതിനു ശേഷം തന്റെ മാതാപിതാക്കള്‍ പോലും തന്നെ വിശ്വസിക്കുന്നില്ലെന്ന് ആത്മഹത്യക്കുറിപ്പില്‍ പെണ്‍കുട്ടി വ്യക്തമാക്കുന്നു.
ഫോട്ടോകൾ പോസ്റ്റ് ചെയ്തയാൾക്ക് ഒരിക്കലും അത്തരത്തിലുള്ള ഫോട്ടോകൾ താന്‍ അയച്ചു കൊടുത്തിട്ടില്ല. അമ്മയും അച്ഛനും പോലും വിശ്വസിക്കുന്നില്ലെങ്കിൽ പിന്നെ ജീവിച്ചിരിക്കുന്നതിൽ എന്ത് അര്‍ത്ഥമാണ് ഉള്ളതെന്നും കുറിപ്പിൽ പെണ്‍കുട്ടി ചോദിക്കുന്നു.
അതേസമയം, ദിവസങ്ങൾക്ക് മുമ്പു തന്നെ പരാതി നല്കിയിട്ടും നടപടി എടുക്കാൻ പൊലീസ് തയ്യാറായില്ലെന്ന് മാതാപിതാക്കൾ പറഞ്ഞു. കുറ്റവാളിയെ അറസ്റ്റ് ചെയ്യണമെന്നും നഗ്നഫോട്ടോകൾ നീക്കം ചെയ്യണമെന്നും ആവശ്യപ്പെട്ട് ഈ മാസം 23നായിരുന്നു ഇവർ പൊലീസിനെ സമീപിച്ചത്.
ഇതിനിടെ, നഗ്നഫോട്ടോകൾ പോസ്റ്റ് ചെയ്ത അക്കൗണ്ട് ബ്ലോക്ക് ചെയ്തിട്ടുണ്ടെന്നും ആത്മഹത്യാപ്രേരണക്ക് കേസ് എടുത്തിട്ടുണ്ടെന്നും പൊലീസ് അറിയിച്ചു.