കൊച്ചിയില്‍ യുവനടിയെ തട്ടിക്കൊണ്ടു പോയി ഉപദ്രവിച്ച കേസില്‍ നടന്‍ ദിലീപിനെ അറസ്‌റ്റ് ചെയ്‌തതിന് പിന്നാലെ താര സംഘടനയായ അമ്മയില്‍ നിന്നും പുറത്താക്കിയത് കൂട്ടായി എടുത്ത തീരുമാനത്തിന്റെ ഭാഗമായിരുന്നുവെന്ന് കലാഭവന്‍ ഷാജോണ്‍.
പൃഥ്വിരാജിന്റെ സമ്മര്‍ദ്ദത്തില്‍ മമ്മൂട്ടി കൈക്കൊണ്ട തീരുമാനമാണ് ദിലീപിനെ അമ്മയില്‍ നിന്നും പുറത്താക്കിയതെന്ന വാര്‍ത്ത തെറ്റാണ്. വിഷയത്തില്‍ എല്ലാവരുടെയും അഭിപ്രായം തേടിയിരുന്നു. തുടര്‍ന്ന് ഞാന്‍ അടക്കമുള്ള താരങ്ങള്‍ പിന്തുണച്ചതോടെയാണ് ദിലീപിനെ സംഘടനയില്‍ നിന്നും പുറത്താക്കിയതെന്നും ഷാജോണ്‍ വ്യക്തമാക്കി.
ദിലീപിനെ സംഘടനയില്‍ നിന്നും പുറത്താക്കിയ തീരുമാനം തെറ്റിയെന്നു ഇപ്പോള്‍ താന്‍ സംശയിക്കുന്നു. ആ തീരുമാനം പുനരാലോചിക്കണമെന്നാണ് എന്റെ അഭിപ്രായമെന്നും ഷാജോണ്‍ കൂട്ടിച്ചേര്‍ത്തു.
സിനിമാ മേഖലയിലെ സ്‌ത്രീ കൂട്ടായ്‌മയായ വിമൻ ഇൻ കലക്ടീവ് സംഘടനയുടെ പ്രവർ‌ത്തനം സിനിമയിലെ എല്ലാ സ്ത്രീകൾക്കും വേണ്ടിയാകണം. ജൂനിയർ ആർട്ടിസ്റ്റുകൾ ഉൾപ്പെടെ എല്ലാ സ്ത്രീകൾക്കും അതിൽ ഇടം നൽകണം. ചുരുക്കം ചില പേരുകളിലേക്കു സംഘടന ഒതുങ്ങരുതെന്നും മനോരമ ന്യൂസിന്റെ ‘നേരേ ചൊവ്വേ’ പരിപാടിയിൽ കലാഭവന്‍ ഷാജോണ്‍ പറഞ്ഞു.
