കഴിഞ്ഞ ദിവസം കൊച്ചി കലക്‌ടറേറ്റില്‍ നടന്ന സ്‌ഫോടനം യാ‍ദൃശ്‌ചികമല്ലെന്ന് ഡി ജി പി ജേക്കബ് പുന്നൂസ് പറഞ്ഞു. സ്‌ഫോടനം നടന്ന കൊച്ചി കലക്‌ടറേറ്റ് സന്ദര്‍ശിച്ചതിനു ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
വളരെ ബോധപൂര്‍വ്വം ചെയ്ത പ്രവര്‍ത്തിയാണിത്. ഈ സ്‌ഫോടനം യാദൃശ്‌ചികമല്ല. ഉഗ്രസ്‌ഫോടന ശേഷിയുള്ള വസ്തുവാണ്‍ പൊട്ടിത്തെറിച്ചത്. സംഭവത്തെക്കുറിച്ച് വിശദമായ അന്വേഷണം നടത്തും. സ്‌ഫോടനവുമായി ബന്ധപ്പെട്ടിട്ടുള്ള എല്ലാ വ്യക്തികളെയും, ഗ്രൂപ്പുകളെയും സംബന്ധിച്ച് അന്വേഷണം നടത്തും.
സംസ്ഥാനത്ത് മുമ്പ് നടന്നിട്ടുള്ള ചില സംഭവങ്ങളുമായി ഈ സ്‌ഫോടനത്തിനുള്ള സാമ്യം അവഗണിക്കാന്‍ പറ്റില്ല. എല്ലാ സാധ്യതകളും പരിഗണിച്ചായിരിക്കും അന്വേഷണം നടത്തുക. ഇത് സംബന്ധിച്ച അന്വേഷണത്തിന് ഏതെല്ലാം കേന്ദ്ര ഏജന്‍സികളുടെ സഹായം ലഭ്യമാക്കാന്‍ കഴിയുമോ അതെല്ലാം ലഭ്യമാക്കാന്‍ ശ്രമിക്കുമെന്നും ഡി ജി പി അറിയിച്ചു.