പഫ്‌സ് വാങ്ങാന്‍ പത്ത് രൂപ മോഷ്ടിച്ചെന്നാരോപിച്ച് അമ്മ മകനെ പൊള്ളലേല്‍പിച്ചു. കുട്ടിയുടെ മുഖത്തും കൈയ്യിലും വയറിലുമാണ് പൊള്ളലേല്‍പിച്ചത്. തൊടുപുഴ പെരുമ്പിള്ളിച്ചിറയിൽ ഇന്നലെയായിരുന്നു ക്രൂരമായ ഈ സംഭവം നടന്നത്‍. ഇന്നു രാവിലെ കുട്ടിയെ സ്കൂളിൽ പോകാന്‍ കഴിയാത്ത സാഹചര്യത്തില്‍ കണ്ടെത്തിയ അയല്‍‌വാസി കുട്ടിയോടു വിവരം ചോദിച്ചപ്പോളാണ് ഞെട്ടിക്കുന്ന ഈ സംഭവം പുറത്തറിഞ്ഞത്.
തുടര്‍ന്ന് അയല്‍‌വാസി ഈ വിവരം ശിശുക്ഷേമ സമിതിയെ അറിയിച്ചു. അവർ സ്ഥലത്തെത്തിയശേഷമാണ് സാരമായി പരുക്കേറ്റ കുട്ടിയെ ആശുപത്രിയിൽ പ്രവേശിപ്പിച്ചത്. അടുപ്പിൽനിന്നു വിറകെടുത്താണ് അമ്മ മൂന്നാംക്ലാസ്സുകാരനെ പൊള്ളലേൽപ്പിച്ചത്. കൂടാതെ, മറ്റു പല ദിവസങ്ങളിലും കുട്ടിയുടെ നേർക്ക് ഇത്തരം ക്രൂരമായ ആക്രമണങ്ങൾ ഉണ്ടാകാറുണ്ടെന്നും സമീപവാസികൾ പറഞ്ഞു.
കുട്ടിയുടെ അമ്മ രമ്യയും പിതാവ് ബിനുവും കുട്ടിയെ നിരന്തരം ഉപദ്രവിച്ചിരുന്നു. കുട്ടി നിലവിളിക്കുന്ന സമയത്ത് ശബ്ദം പുറത്തുവരാതിരിക്കാനായി വായിൽ തുണി തിരുകിവയ്ക്കുന്ന തരത്തിലുള്ള സംഭവങ്ങള്‍ ഉണ്ടായിട്ടുണ്ടെന്നും നാട്ടുകാർ പറയുന്നു. കുട്ടിയുടെ പരാതിയില്‍ ജുവനൈല്‍ ജസ്റ്റിസ് നിയമപ്രകാരം കേസെടുത്ത് അന്വേഷണം നടത്തുമെന്ന് പൊലീസ് അറിയിച്ചു.