നടിയെ ആക്രമിച്ച കേസില്‍ ജയിലില്‍ കഴിയുന്ന നടന്‍ ദിലീപിന് ഇന്ന് ഉറക്കമില്ലാത്ത രാത്രിയായിരിക്കും. താരത്തെ ജാമ്യാപേക്ഷയില്‍ ഹൈക്കോടതി വിധി പറയുന്നത് നാളെയാണ്. ജാമ്യാപേക്ഷയിലെ വാദം പൂര്‍ത്തിയാകാത്തതിനെ തുടര്‍ന്നാണ് അന്തിമ വിധിക്കായി ഒരു രാത്രി കൂടി കാത്തിരിക്കേണ്ടി വരുന്നത്. കോടതിയില്‍ ശക്തമായ വാദമുഖങ്ങളാണ് ദിലീപിനായി അഭിഭാഷകന്‍ ബി രാമന്‍ പിള്ള ഉന്നയിച്ചിരിക്കുന്നത്.
എന്നാല്‍, കാര്യങ്ങള്‍ ദിലീപിന് അത്ര ഈസിയായിരിക്കില്ലെന്നാണ് സൂചനകള്‍. നാളെ കോടതി മുമ്പാകെ പ്രോസിക്യൂഷന്‍ സമര്‍പ്പിക്കുന്ന രേഖകള്‍ നിര്‍ണായകമാകുമെന്നാണ് റിപ്പോര്‍ട്ട്. താരത്തിന് അനുകൂലമായ വിധി വരുമെന്നാണ് ആരാധകരും കുടുംബവും കരുതുന്നത്. കഴിഞ്ഞ തവണ ജാമ്യം നിഷേധിച്ച അതേ ജഡ്ജി തന്നെയാണ് ഇത്തവണയും കേസ് പരിഗണിക്കുന്നത്.
അന്വേഷണ ഉദ്യോഗസ്ഥരെ പ്രതിക്കൂട്ടില്‍ നിര്‍ത്തുന്ന തരത്തിലാണ് ദിലീപിന്റെ പുതിയ ജാമ്യ ഹര്‍ജി. താരത്തിന്റെ മുന്‍‌ഭാര്യയായിരുന്ന മഞ്ജു വാര്യര്‍ക്കും സംവിധായകന്‍ ശ്രീകുമാര്‍ മേനോനും നിര്‍മാതാവ് ലിബര്‍ട്ടി ബഷീറിനും എതിരെ ഗുരുതര ആരോപണങ്ങള്‍ ദിലീപ് ഉന്നയിക്കുന്നുണ്ട്.