കേന്ദ്ര പ്രതിരോധമന്ത്രി എ കെ ആന്‍റണിയോട് തനിക്ക് തീര്‍ത്താല്‍ തീരാത്ത കടപ്പാട് ആണ് ഉള്ളതെന്ന് വ്യവസായമന്ത്രി എളമരം കരീം. കോഴിക്കോട് ഒരു ചടങ്ങില്‍ സംസാരിക്കുകയായിരുന്നു അദ്ദേഹം.
കേന്ദ്ര പൊതുമേഖല സ്ഥാപനങ്ങള്‍ സംസ്ഥാനത്തിന് അനുവദിച്ചു തന്നതില്‍ ആന്‍റണിയുടെ പങ്ക് നിര്‍ണായകമാണ്. ഇടതുമുന്നണി സര്‍ക്കാര്‍ അധികാരത്തില്‍ വരുമ്പോള്‍ വെറും 12 പൊതു മേഖല സ്ഥാപനങ്ങളായിരുന്നു ലാഭത്തിലുണ്ടായിരുന്നത്. എന്നാല്‍ ഇപ്പോള്‍ അത് 42 ആയി ഉയര്‍ന്നിരിക്കുകയാണ്.
ആന്‍റണിയുടെ ഇടപെടല്‍ സംസ്ഥാനത്തെ വ്യവസായ ലോകത്തിന് പുത്തന്‍ ഉണര്‍വ് നല്കിയെന്നും അദ്ദേഹം പറഞ്ഞു.
അതേസമയം, കിനാലൂര്‍ വിഷയത്തില്‍ തനിക്ക് മുഖ്യമന്ത്രി വി എസ് അച്യുതാനന്ദന്‍റെ പൂര്‍ണ പിന്തുണയുണ്ടെന്ന് മന്ത്രി എളമരം കരീം പറഞ്ഞു. അതിനാലാണ് കിനാലൂര്‍ വിഷയത്തില്‍ സര്‍വ്വകക്ഷിയോഗം വിളിക്കാന്‍ മുഖ്യമന്ത്രി മുന്‍കൈ എടുത്തതെന്നും കരീം കോഴിക്കോട് മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടിയായി പറഞ്ഞു.