ഓസ്‌ട്രേലിയക്കെതിരായ ടെസ്റ്റ് അരങ്ങേറ്റത്തിലെ ആദ്യ പന്തില്‍ തന്നെ ഓസ്‌ട്രേലിയന്‍ ഇതിഹാസ ബാറ്റര്‍ സ്റ്റീവ് സ്മിത്തിനെ പുറത്താക്കികൊണ്ടാണ് വെസ്റ്റിന്‍ഡീസ് യുവപേസര്‍ ഷമര്‍ ജോസഫ് അന്താരാഷ്ട്ര ക്രിക്കറ്റില്‍ തന്റെ വരവറിയിച്ചത്. ഗാബ ടെസ്റ്റില്‍ ഓസീസിനെ മുട്ടുകുത്തിച്ചത് യുവപേസറുടെ തീയുണ്ടകളായിരുന്നു. അതിനാല്‍ തന്നെ ഏറെ പ്രതീക്ഷയോടെയാണ് ആരാധകര്‍ ഐപിഎല്ലിലെ ഷമര്‍ ജോസഫിന്റെ അരങ്ങേറ്റ മത്സരത്തിനായി കാത്തിരുന്നത്. എന്നാല്‍ ഐപിഎല്ലില്‍ ലഖ്‌നൗവിനായി അരങ്ങേറികൊണ്ടുള്ള ആദ്യമത്സരത്തിലെ ആദ്യ ഓവറില്‍ താരം വിട്ടുകൊടുത്തത് 22 റണ്‍സാണ്. നോബോളുകളും വൈഡുകളും തുടരെ വന്നപ്പോള്‍ ആദ്യ ഓവറില്‍ 10 പന്തുകള്‍ എറിയേണ്ടി വന്നു എന്ന നാണക്കേടും ഷമര്‍ ജോസഫ് സ്വന്തമാക്കി.
