തിരഞ്ഞെടുപ്പുകളില്‍ വോട്ടര്‍മാരുടെ പങ്കാളിത്തം ഉറപ്പുവരുത്താനും വോട്ടെടുപ്പ് സംവിധാനം ശക്തിപ്പെടുത്താനുമായി യുഎസ് ഇന്ത്യയ്ക്കു നല്‍കിയിരുന്ന സാമ്പത്തിക സഹായം റദ്ദാക്കി. ഇന്ത്യയുടെ കൈയില്‍ ഒരുപാട് പണമുണ്ടെന്ന വിചിത്രവാദം ഉന്നയിച്ചാണ് യുഎസ് പ്രസിഡന്റ് ഡൊണാള്‍ഡ് ട്രംപിന്റെ നടപടി. യുഎസ് സര്‍ക്കാരിന്റെ ചെലവ് കുറയ്ക്കല്‍ വിഭാഗമായ ഡിപ്പാര്‍ട്ട്‌മെന്റ് ഓഫ് ഗവണ്‍മെന്റ് എഫിഷ്യന്‍സി അഥവാ ഡോജ് (DOGE) ന്റെ ശുപാര്‍ശ അനുസരിച്ചാണ് ഇന്ത്യയ്ക്കുള്ള ധനസഹായം നിര്‍ത്താന്‍ ട്രംപ് തീരുമാനിച്ചത്.
' നമ്മള്‍ എന്തിനാണ് ഇന്ത്യക്ക് 21 മില്യണ്‍ ഡോളര്‍ നല്‍കുന്നത്? അവരുടെ കൈയില്‍ ഒരുപാട് പണമുണ്ട്. ലോകത്ത് ഏറ്റവും കൂടുതല്‍ നികുതി ചുമത്തുന്ന രാജ്യങ്ങളില്‍ ഒന്നാണ് ഇന്ത്യ. ഉയര്‍ന്ന നികുതി മൂലം അമേരിക്കയ്ക്ക് ഇന്ത്യന്‍ വിപണിയില്‍ ഒട്ടേറെ പ്രതിസന്ധികള്‍ ഉണ്ട്. ഇന്ത്യയോടും പ്രധാനമന്ത്രി നരേന്ദ്ര മോദിയോടും എനിക്ക് വലിയ ബഹുമാനമുണ്ട്. പക്ഷേ ഇന്ത്യയിലെ വോട്ടര്‍മാരുടെ പങ്കാളിത്തം ഉറപ്പാക്കാന്‍ നമ്മള്‍ 21 മില്യണ്‍ ഡോളര്‍ നല്‍കുന്നതിന്റെ ആവശ്യമെന്താണ്?,' ട്രംപ് പറഞ്ഞു.
