നേരത്തെ ശ്രീലങ്കയിലെ സാമ്പത്തികനില തകർന്നപ്പോൾ സഹായവുമായി ഇന്ത്യ എത്തിയിരുന്നു. ശ്രീലങ്കയിലെ നൂറിലധികം വിമാനങ്ങൾക്ക് ഇന്ധനവും ജനങ്ങൾക്ക് അരിയും മറ്റ് സാധനങ്ങളും ഇന്ത്യ നൽകിയിരുന്നു. ചൈനയുമായി അടുപ്പമുള്ള രജപക്സ കുടുംബം പുറത്തായതോട് കൂടി റനിൽ വിക്രമസിംഗെയുടെ നേതൃത്വത്തിലുള്ള സർക്കാർ സ്ഥിതിഗതികളിൽ സ്ഥിരത കൊണ്ടുവരുമെന്നാണ് ഇന്ത്യ കരുതിയിരുന്നത്.
റനിൽ വിക്രമസിംഗെയ്ക്ക് കീഴിൽ ലങ്കയിൽ സ്ഥിരത ഉറപ്പാക്കാനാകുമെന്നാണ് ഇന്ത്യൻ പ്രതീക്ഷ. ഇതിനുള്ള സഹകരണം ഇന്ത്യ ലങ്കയ്ക്ക് നൽകുകയും ചെയ്യും. എന്നാൽ കാര്യങ്ങൾ കൈവിട്ടാൽ ധനസഹായം നൽകാനെന്ന പേരിൽ ചൈന ശ്രീലങ്കയുടെ നിയന്ത്രണമേറ്റെടുക്കുമോ എന്നതാണ് ഇന്ത്യ ഭയപ്പെടുന്നത്. ശ്രീലങ്കൻ തുറമുഖങ്ങളിൽ പ്രതിസന്ധിയുണ്ടായാൽ ഇന്ത്യയുടെ വ്യാപാരത്തെ ബാധിക്കുമെന്നത് മാത്രമല്ല അഭയാർഥിപ്രവാഹത്തെയും ഇന്ത്യ ഭയക്കുന്നുണ്ട്. ഈ സാഹചര്യത്തിൽ ലങ്കയിലെ കലാപം കെട്ടടങ്ങേണ്ടത് ഇന്ത്യയ്ക്കും പ്രധാനമാണ്.
