ഹോണ്ടുറാസ് സുന്ദരി മരിയ ജോസ് അല്‍വാറാഡോയുടെ മരണത്തിന് കാരണമായത് സഹോദരിയുടെ കാമുകന്റെ പകയെന്ന് റിപ്പോര്‍ട്ട്. മരിയേയും സഹോദരിയായ സോഫിയേയും വെടിവെച്ച് കൊന്നത് താനാണെന്ന് സോഫിയയുടെ കാമുകന്‍ പ്ലൂട്ടാര്‍ക്കോ റൂയിസ് വ്യക്തമാക്കിയെന്നാണ് റിപ്പോര്‍ട്ട്.
കഴിഞ്ഞ ദിവസം സുഹൃത്തിന്റെ ജന്മദിന പാര്‍ട്ടിയില്‍ മൂന്നു പേരും പങ്കെടുത്തിരുന്നു. ചടങ്ങില്‍ റൂയിസിന്റെ കാമുകിയായ സോഫിയ ട്രിനിഡാഡ് മറ്റൊരു പുരുഷനൊപ്പം നൃത്തം ചെയ്യുന്നതില്‍ കലിപൂണ്ട യുവാവ് ചടങ്ങ് കഴിഞ്ഞ് പുറത്ത് ഇറങ്ങിയ ഇവര്‍ക്ക് നേരെ വെടിവെക്കുകയായിരുന്നു. ഓടി രക്ഷപെടാന്‍ ശ്രമിച്ച മരിയയെയും കാമുകിയേയും സഹോദരിയുടെ കാമുകന്‍ വെടിവെച്ച് വീഴ്ത്തി.
മരണം ഉറപ്പാക്കിയ ശേഷം ഇരുവരുടെയും മൃതദേഹങ്ങള്‍ ആഗ്വാഗ്വ പുഴയുടെ തീരത്ത് കുഴിച്ചിടുകയായിരുന്നു. റൂയിസിനെയും സഹായിയെയും പൊലീസ് നേരത്തെ കസ്റ്റഡിയിലെടുത്തിരുന്നു. കോട്ട് 45 പിസ്റ്റളും രണ്ടു വാഹനങ്ങളും പിടിച്ചെടുത്തിട്ടുണ്ട്. ലോകസുന്ദരി മല്‍സരത്തിനു പുറപ്പെടുന്നതിനു രണ്ടുദിവസം മുമ്പ് കഴിഞ്ഞ വ്യാഴാഴ്ചയാണ് മരിയയെയും സഹോദരിയെയും കാണാതായത്.