പാകിസ്ഥാനില്‍ തെരഞ്ഞെടുപ്പ് പ്രചരണത്തിനിടെ വേദിയില്‍ നിന്ന് വീണ് പാകിസ്ഥാന്‍ മുന്‍ ക്രിക്കറ്റ് ക്യാപ്ടനും തെഹ്‌രിക് ഇ ഇന്‍‌സാഫ് ചെയര്‍മാനുമായ ഇമ്രാന് ഖാന് ഗുരുതരമായി പരുക്കേറ്റു. ഇമ്രാന് തലയ്ക്കാണ് പരുക്കേറ്റിരിക്കുന്നത്.
അദ്ദേഹത്തെ ഉടന്‍ തന്നെ ആശുപത്രിയില്‍ പ്രവേശിപ്പിച്ചു. ലാഹോറിലെ പ്രചരണത്തിനിടെയാണ് അപകടം. ധാരാളം രക്തം നഷ്ടപ്പെട്ടിട്ടുണ്ട്. ആംബുലന്‍സ് ഇല്ലാത്തതിനാല്‍ കാറിലാണ് ആശുപത്രിയിലെത്തിച്ചത്.
14 അടി ഉയരമുള്ള വേദിയില്‍ നിന്നാണ് ഇമ്രാന് ഖാന് നിലം പതിച്ചത്. അദ്ദേഹത്തിന്‍റെ പാര്‍ട്ടിയുടെ രണ്ട് പ്രമുഖരും ഒപ്പം പതിച്ചു. നിലത്തുണ്ടായിരുന്ന ഒരു ഇരുമ്പ് പാളിയില്‍ തലയിടിച്ചാണ് ഇമ്രാന് ഖാന് പരുക്കേറ്റത്. അപകടത്തിന് ശേഷം അദ്ദേഹം ബോധരഹിതനായ അവസ്ഥയിലായിരുന്നു.
ഒടുവില്‍ കിട്ടുന്ന വിവരം അനുസരിച്ച് ഇമ്രാന് ഖാന് ബോധം വീണ്ടുകിട്ടിയിട്ടുണ്ട്. അദ്ദേഹത്തിന്‍റെ ആരോഗ്യനിലയില്‍ ആശങ്കപ്പെടാനില്ലെന്ന വിവരമാണ് ലഭിക്കുന്നത്.
പാകിസ്ഥാനില്‍ തെരഞ്ഞെടുപ്പിന് മണിക്കൂറുകള്‍ മാത്രം ബാക്കിനില്‍ക്കെയാണ് ഇമ്രാന് ഖാന് ഈ അപകടം സംഭവിച്ചിരിക്കുന്നത്.