പാകിസ്ഥാനില്‍ 35 തീവ്രവാദികള്‍ കൊല്ലപ്പെട്ടു. വടക്ക് കിഴക്കന്‍ പാകിസ്ഥാന്‍ പ്രവിശ്യയായ കൈബര്‍ ട്രൈബല്‍ പ്രദേശത്ത് സൈന്യം നടത്തിയ ആക്രമണത്തിലാണ് തീവ്രവാദികള്‍ കൊല്ലപ്പെട്ടത്.
കഴിഞ്ഞ രണ്ട് ദിവസമായി പ്രദേശത്ത് സൈന്യവും തീവ്രവാദികളും തമ്മില്‍ രൂക്ഷമായ ഏറ്റുമുട്ടല്‍ നടന്നു വരികയാണ്. കൈബര്‍ പ്രദേശത്തുള്ള തീവ്രവാദികളുടെ ആധിപത്യം അവസാനിപ്പിക്കാനാണ് സൈന്യം ഓപ്പറേഷന്‍ നടത്തുന്നത്. പാകിസ്ഥാനിലുള്ള ട്രൈബല്‍ പ്രദേശങ്ങളില്‍ താലിബാന്‍ പോരാളികള്‍ ഒളിച്ച് കഴിയുന്നതായി പട്ടാളത്തിന് വിവരം ലഭിച്ചിരുന്നു.
പ്രദേശങ്ങളിലെ ട്രൈബല്‍ മേഖലകളില്‍ നിന്നും കൂടുതല്‍ താലിബാന്‍ തീവ്രവാദികളെ പുറത്ത് കൊണ്ടു വരാന്‍ സൈന്യത്തിന് സാധിക്കുന്നുണ്ടെന്നും ആര്‍മി വക്താക്കള്‍ അറിയിച്ചു.