ഹോളിവുഡ് ചിത്രങ്ങളില്‍ നമ്മള്‍ ശ്വാസമടക്കിപ്പിടിച്ച് കണ്ടിരിക്കാറുള്ള രംഗങ്ങളാണ് റഷ്യയിലെ ജയിലില്‍ യഥാര്‍ത്ഥത്തില്‍ അരങ്ങേറിയത്. മോക്സോയില്‍ നിന്ന് 300 കിലോമീറ്റര്‍ അകലെയുള്ള ഷെക്സാന ജയിലിലെ ഒരു തടവുകാരന്‍ ജയിലില്‍ നിന്ന് ഹെലികോപ്ടറില്‍ രക്ഷപ്പെടുകയായിരുന്നു. കൊലക്കേസില്‍ 24 വര്‍ഷം ശിക്ഷിക്കപ്പെട്ട അലക്സി ഷെക്താകോവാണ്(34) തടവ് ചാടിയത്. പക്ഷേ ഇയാളുടെ സ്വാതന്ത്ര്യം ഏറെ നേരം നീണ്ടുനിന്നില്ല. സുരക്ഷാ ഉദ്യോഗസ്ഥര്‍ ഇയാളെ തിരഞ്ഞുപിടിച്ച് ജയിലില്‍ എത്തിച്ചു.
രണ്ടു സുഹൃത്തുക്കളുടെ സഹായത്തോടെയാണ് ഷെക്താകോവ് ജയിലില്‍ നിന്ന് രക്ഷപ്പെട്ടത്. ബിസിനസ്സ് ആവശ്യങ്ങള്‍ക്കെന്ന് പറഞ്ഞാണ് ഒരു സ്ത്രീയും പുരുഷനും ഹെലികോപ്ടര്‍ വാടകയ്ക്കെടുത്തത്. തുടര്‍ന്ന് പൈലറ്റിനെ ഭീഷണിപ്പെടുത്തി ഹെലികോപ്ടര്‍ ജയിലിലേക്ക് പറത്താന്‍ ആവശ്യപ്പെട്ടു. ജയിലിന് മുകളിലൂടെ അത് വട്ടമിട്ടു പറക്കുന്നത് കണ്ട് അധികൃതര്‍ അമ്പരന്നു. താഴെയ്ക്കു എറിഞ്ഞുകൊടുത്ത കയര്‍ ഏണിയിലൂടെ ഷെക്താകോവ് ഹെലികോപ്ടറിലേക്ക് കയറിപ്പോകുന്നത് ജയില്‍ അധികൃതര്‍ക്ക് നോക്കി നില്‍ക്കാനെ കഴിഞ്ഞുള്ളൂ. അങ്ങനെ ഷെക്താകോവിനെയും കൊണ്ട് ഹെലികോപ്ടര്‍ പറന്നകന്നു.
പക്ഷേ സുരക്ഷാ ഉദ്യോഗസ്ഥര്‍ പുറത്ത് വലവിരിച്ചു. ഹെലികോപ്ടര്‍ ഉപേക്ഷിച്ച് ടാക്സിയില്‍ പുറപ്പെടാന്‍ ശ്രമിക്കവേയാണ് ഷെക്താകോവ് പിടിയിലായത്.
English Summary: Police in Russia have recaptured a murderer after he made a Hollywood-style escape from prison with the help of two friends who hijacked a helicopter and hoisted him aboard with a rope ladder.