രാജ്യാന്തര ചലച്ചിത്രങ്ങള്‍ക്ക്‌ കാഴ്ചക്കാരെ ഒരുക്കുന്നതില്‍ കേരളത്തിന്‍റെ പാരമ്പര്യം ഒരു വ്യാഴവട്ടത്തിലേക്ക്‌ കടക്കുന്നു. പന്ത്രണ്ടാമത്‌ ചലച്ചിത്രമേളക്ക്‌ അനന്തപുരി ഒരുങ്ങി കഴിഞ്ഞു. ഗൗരവമുള്ള സിനിമകള്‍ മാത്രം എടുത്ത്‌ മലയാള സിനിമയില്‍ വ്യത്യസ്തമായ സാന്നിധ്യം അറിയിച്ച സംവിധായകന്‍ കെ ആര്‍ മോഹനന്‍ ആണ്‌ ഇത്തവണയും മേളക്ക്‌ ചുക്കാന്‍ പിടിക്കുന്നത്‌. കേരള ചലച്ചിത്ര അക്കാദമി ചെയര്‍മാന്‍ എന്ന നിലയില്‍ പതിനൊന്നാം രാജ്യാന്തരമേള സംഘടിപ്പിച്ചതിന്‍റെ അനുഭവ പരിചയവുമായാണ്‌ മോഹനന്‍ പുതിയ മേള ഒരുക്കുന്നത്‌. ഗൗരവമുള്ള സിനിമകളെ ഇഷ്ടപ്പെടുന്ന പ്രേക്ഷകന്‍ എന്ന നിലയിലും അശ്വത്ഥാമാവ്‌, പുരുഷാര്‍ത്ഥം, സ്വരൂപം എന്നീ ചിത്രങ്ങളുടെ സംവിധായകന്‍ എന്ന നിലയിലും അദ്ദേഹത്തിന്‌ പുതിയ മേളയെ കുറിച്ച് പ്രതീക്ഷകള്‍ ഏറെ. സിനിമയുടെ ഉത്സവത്തിന്‌ കൊടി ഉയരാന്‍ മണിക്കൂറുകള്‍ മാത്രം ബാക്കി നില്‍ക്കെ മേളയെ കുറിച്ച് മോഹനന്‍ സംസാരിക്കുന്നു
ഉത്തരം: വ്യത്യസ്തമായ പാക്കേജുകളാണ്‌ ഇത്തവണത്തെ മേളക്ക്‌ ഒരുക്കിയിരിക്കുന്നത്‌. കേരളത്തില്‍ ഇതിന്‌ മുമ്പ്‌ എത്തിയിട്ടില്ലാത്ത രാജ്യങ്ങളില്‍ നിന്നുള്ള ചിത്രങ്ങള്‍. ലോകത്തെ രാഷ്ട്രീയ കാലാവസ്ഥയെ കുറിച്ച് തിരിച്ചറിവുകള്‍ നല്‍കുന്ന ചിത്രങ്ങള്‍, മഹാന്മാരായ സിനിമക്കാരുടെ സ്മൃതിവിഭാഗങ്ങള്‍, ഇത്തവണ ലോക സിനിമ വിഭാഗത്തില്‍ മിക്കവയും പുതിയ ചിത്രങ്ങളാണ്‌.ഇന്ത്യയിലും ഏഷ്യയില്‍ പോലും ആദ്യമായി എത്തുന്ന ചിത്രങ്ങള്‍ നമ്മുടെ മേളയില്‍ എത്തുന്നുണ്ട്‌
ചോദ്യം: ശ്രദ്ധേയമായ പാക്കേജുകള്‍?
ഉത്തരം: ബാല്‍ക്കണ്‍ ചിത്രങ്ങളുടെ പാക്കേജ്‌ സവിശേഷ പ്രാധാന്യം അര്‍ഹിക്കുന്നു. ബാള്‍ട്ടിക്‌ രാജ്യങ്ങളില്‍ നിന്നുള്ള സിനിമകള്‍ വളരെ നാളായി രാജ്യാന്തതലത്തില്‍ ശ്രദ്ധിക്കപ്പെട്ടിട്ട്‌. വന്‍ രാഷ്ട്രീയ മാറ്റങ്ങള്‍ നടക്കുന്ന രാജ്യങ്ങളില്‍ നിന്നുള്ള ചിത്രങ്ങള്‍ക്ക്‌ കൃത്യമായ രാഷ്ട്രീയ പ്രാധാന്യമുണ്ടാകും. പലരാജ്യങ്ങളായി പിരിഞ്ഞതിന്‌ ശേഷം ഈ രാജ്യങ്ങളില്‍ ഉണ്ടായ പുതിയ രാഷ്ട്രീയ കാലാവസ്ഥകളെ അടുത്തറിയാനുള്ള അവസരമായിരിക്കും ഈ ചിത്രങ്ങള്‍.
ചോദ്യം:കരീബിയിന്‍ ചിത്രങ്ങളുടെ പ്രത്യേക പാക്കേജും പുതുമയല്ലേ?
ഉത്തരം: ആഫ്രിക്കയില്‍ നിന്നുള്ള ശക്തമായ ചില ചിത്രങ്ങളും ഇത്തവണ മേളയില്‍ ഉണ്ട്‌. ശക്തമായ രാഷ്ട്രീയ മാറ്റങ്ങള്‍ ഉണ്ടാകുന്ന ഈ രാജ്യങ്ങളില്‍ നിന്നുള്ള ചിത്രങ്ങള്‍ ഇന്ത്യന്‍ സാഹചര്യത്തിലും പ്രസക്തമാണ്‌, കൊളോണിയല്‍ ലെഗസീസ്‌ എന്ന പേരിലാണ്‌ ഈ ചിത്രങ്ങള്‍ മേളയില്‍ പ്രദര്‍ശിപ്പിക്കുന്നത്‌.
ചോദ്യം: കഴിഞ്ഞ രണ്ടു മേളകളിലും പ്രേക്ഷകരെ ഏറെ ആകര്‍ഷിച്ച സംവിധായകനായിരുന്നും കിം കി ദുക്‌, ഇത്തവണ അദ്ദേഹത്തിന്‍റെ ചിത്രമുണ്ടാകുമോ?
ഉത്തരം: അദ്ദേഹത്തിന്‍റെ ഏറ്റവും പുതിയ ചിത്രം മേളയില്‍ എത്തുമെന്നാണ്‌ പ്രതീക്ഷിക്കുന്നത്‌.
ചോദ്യം: കിം കി ദുകിനെ പോലെ ഇത്തവണ മേളയിലെ താരമാകാന്‍ സാധ്യതയുള്ള ചലച്ചിത്രകാരന്‍ ആരായിരിക്കും?
ഉത്തരം:സ്പാനിഷ്‌ ചലച്ചിത്രകാരന്‍ പെദ്രോ അല്‍മദൊവാറിന്‍റെ പ്രത്യേക പാക്കേജ്‌ ഇത്തവണ ശ്രദ്ധിക്കപ്പെട്ടേക്കും. പതിമൂന്ന്‌ ചിത്രങ്ങള്‍ അടങ്ങിയ പാക്കേജാണ്‌ മേളയില്‍ എത്തുന്നത്‌.അദ്ദേഹത്തിന്‍റെ വോള്‍വര്‍ കഴിഞ്ഞ തവണ ഏറെ ശ്രദ്ധിക്കപ്പെട്ടിരുന്നു.മേളയിലെ സ്ഥിരം പ്രതിനിധികള്‍ ഇത്തവണ നോട്ടമിടുക അല്‍മദൊവാറിനെ ആയിരിക്കും.
ചോദ്യം: വര്‍ഷങ്ങള്‍ കഴിയും തോറും മേളയില്‍ വിദ്യാര്‍ത്ഥികളുടെ പ്രാതിനിധ്യം കൂടി വരികയാണല്ലോ?
ഉത്തരം: ഇത്തവണ വിറ്റഴിക്കപ്പെട്ട ഡെലിഗേറ്റ്‌ പാസുകളില്‍ 25 ശതമാനവും വിദ്യാര്‍ത്ഥികളാണ്‌ വാങ്ങിയിരിക്കുന്നത്‌. കൂടുതലും മീഡിയ രംഗങ്ങളിലുള്ളവരാണ്‌. സ്ഥിരമായി മേളയില്‍ വിദ്യാര്‍ത്ഥി സാന്നിധ്യം ഏറി വരികയാണ്‌
ചോദ്യം:പുതുതായി മേളയില്‍ എത്തുന്ന ഈ വിദ്യാര്‍ത്ഥികള്‍ ഏത്‌ ചിത്രങ്ങളാണ്‌ തെരഞ്ഞെടുക്കേണ്ടത്‌?
ഉത്തരം: അങ്ങനെ ഒരു മുന്‍വിധി നല്‍കേണ്ടതില്ല. അഭിരുചിക്ക്‌ അനുസരിച്ച്‌ ഒരോരുത്തര്‍ക്കും ചിത്രങ്ങള്‍ തെരഞ്ഞെടുക്കാവുന്നതാണ്‌. ക്ലാസിക്‌ സിനിമകള്‍ കാണാനുള്ള അവസരവും മേളയില്‍ ഉണ്ട്‌.ലോകത്ത്‌ എന്ത്‌ നടക്കുന്നു എന്നറിയാന്‍ ലോക സിനിമ സെക്ഷന്‌ പ്രത്യേക പ്രാധാന്യം നല്‍കുന്നത്‌ നന്നായിരിക്കും. ലോക സിനിമവിഭാഗത്തില്‍ മിക്കവയും പുതിയ ചിത്രങ്ങളാണ്‌ മേളയില്‍ എത്തിയിരിക്കുന്നത്‌
ചോദ്യം: എത്രയാണ്‌ ഈ മേളയുടെ ചെലവ്‌ പ്രതീക്ഷിക്കുന്നത്‌?
ഉത്തരം: ഏകദേശം ഒന്നരകോടിയാണ്‌ ഈ മേളക്ക്‌ ചെലവ്‌ വരുക. സര്‍ക്കാരിന്‍റെ സഹായമാണ്‌ പ്രധാനമായും. മറ്റ്‌ വഴികളില്‍ നിന്നും പണം കണ്ടെത്തുന്നുണ്ട്‌.