ജോലി, നാല് കോടി രൂപ, സ്ഥലം: ഏത് വേണമെങ്കിലും തെരെഞ്ഞെടുക്കാം, വിനേഷ് ഫോഗാട്ടിന് മുന്നിൽ ഓപ്ഷനുകൾ വെച്ച് ഹരിയാന സർക്കാർ
കായിക താരങ്ങള്‍ക്ക് നല്‍കുന്ന ആനുകൂല്യങ്ങളുടെ ഭാഗമായി ഗുസ്തിതാരം വിനേഷ് ഫോഗട്ടിന് മുന്നില്‍ ഓപ്ഷനുകള്‍ മുന്നോട്ട് വെച്ച് ഹരിയാന സര്‍ക്കാര്‍. നാല് കോടി രൂപയുടെ ക്യാഷ് പ്രൈസ്, ഹരിയാന ഷഹരി വികാസ് പ്രധികരണ്‍ പദ്ധതിക്ക് കീഴില്‍ സ്ഥലം, ഗ്രൂപ്പ് എ സര്‍ക്കാര്‍ ജോലി എന്നിവയില്‍ ഏതെങ്കിലും ഒന്ന് തിരെഞ്ഞെടുക്കാനുള്ള ഓപ്ഷനാണ് കോണ്‍ഗ്രസ് എംഎല്‍എ കൂടിയായ വിനേഷിന് മുന്നില്‍ നല്‍കിയിരിക്കുന്നത്.
മുഖ്യമന്ത്രി നയാബ് സിങ് സെയ്‌നിയുടെ അധ്യക്ഷതയില്‍ ചേര്‍ന്ന ഹരിയാന മന്ത്രിസഭാ യോഗത്തിലാണ് തീരുമാനം. ഒളിമ്പിക്‌സ് വെള്ളി മെഡല്‍ ജേതാവിന് നല്‍കുന്നതാണ് ഈ ആനുകൂല്യം. പാരീസ് ഒളിമ്പിക്‌സ് ഗുസ്തി 50 കിലോ വിഭാഗത്തില്‍ മത്സരിച്ച് ഫൈനലിലെത്തിയ വിനേഷ് ഭാരപരിശോധനയില്‍ 100 ഗ്രാം അധികം വന്നതിനെ തുടര്‍ന്ന് അയോഗ്യയാക്കപ്പെട്ടിരുന്നു.
