അര്‍ജന്റീന നായകന്‍ ലയണല്‍ മെസിക്കെതിരെ ഭീഷണി മുഴക്കി മെക്‌സിക്കോ ബോക്‌സിങ് താരം കാനെലോ അല്‍വാരസ്. മെക്‌സിക്കോയ്‌ക്കെതിരായ മത്സരത്തില്‍ വിജയിച്ച ശേഷം അര്‍ജന്റൈന്‍ താരങ്ങള്‍ ഡ്രസിങ് റൂമില്‍ വിജയാഘോഷം നടത്തുന്നതിന്റെ വീഡിയോ സോഷ്യല്‍ മീഡിയയില്‍ പ്രചരിച്ചിരുന്നു. ഈ വീഡിയോയില്‍ മെക്‌സിക്കന്‍ ജേഴ്‌സിക്ക് സമാനമായ തുണിയില്‍ മെസി ചവിട്ടിയെന്നാണ് ആരോപണം. തങ്ങളുടെ പതാകയെ മെസി അവഹേളിച്ചു എന്നാണ് ബോക്‌സര്‍ കാനെലോ ആരോപിക്കുന്നത്.
തറയില്‍ കിടക്കുന്നത് മെക്‌സിക്കോയുടെ പതാകയാണോ ജേഴ്‌സിയാണോ എന്ന കാര്യത്തില്‍ ഇപ്പോഴും വ്യക്തതയില്ല. എന്നാല്‍ മെസിക്കെതിരെ രൂക്ഷമായ ഭാഷയിലാണ് കാനെലോ പ്രതികരിച്ചിരിക്കുന്നത്.
മെസി ബൂട്ട് കൊണ്ട് മനപ്പൂര്‍വ്വം മെക്‌സിക്കന്‍ ജേഴ്‌സിയില്‍ തട്ടുകയാണെന്ന് ഒരുകൂട്ടര്‍ വാദിക്കുന്നു. എന്നാല്‍ ബൂട്ട് അഴിക്കുന്നതിനിടെ കാല്‍ തട്ടിയതാണെന്നാണ് മെസിയെ പിന്തുണച്ച് ഒരു വിഭാഗം വാദിക്കുന്നത്.