ഒന്നാം പകുതി സൈലന്‍സ്, രണ്ടാം പകുതി വയലന്‍സ്. നയന്‍താരയുടേതായി മൊഴിമാറ്റം ചെയ്ത് വന്ന ‘തുളസി’ എന്ന തെലുങ്ക്-മലയാളം ചിത്രത്തേക്കുറിച്ച് മൊത്ത വിശകലനം ഇതാണ്. പരസ്യത്തില്‍ പറയുന്നത് പോലെ തന്നെ ‘ഹൈ വോള്‍ട്ടേജ് ആക്ഷന്‍’, നയന്‍റെ മാദക സൌന്ദര്യം എന്നിവ ഒഴിച്ചാല്‍ തുളസിയെ കുറിച്ചു കാര്യമായി പറയാന്‍ ഒന്നുമില്ല.
ഘോര സംഘട്ടനങ്ങളും നയനാനന്ദം നല്‍കുന്ന ലോക്കേഷനും ഉള്‍ക്കൊള്ളിച്ചിരിക്കുന്ന ഒരു ടിപ്പിക്കല്‍ തെലുങ്ക് ചിത്രം കാര്യമായി ബോറടിപ്പിക്കുന്നില്ല എന്ന് മാത്രം. പ്രണയം, ആക്ഷന്‍, സെന്‍റിമെന്‍സ്, കോമഡി എല്ലാ ചേരുവകളും സമ്മേളിപ്പിച്ചിരിക്കുന്ന ചിത്രത്തില്‍ ശിവാജി നായിക ശ്രിയയുടെ ഒരു ഐറ്റംനമ്പര്‍ കൂടി ഉള്‍പ്പെടുത്തിയിട്ടുണ്ട്.
നേരത്തെ ഉണ്ടായിരുന്ന അക്രമ ജീവിതത്തില്‍ നിന്നും മാറി നില്‍ക്കുന്ന തുളസി (വെങ്കിടേഷ്) ഗ്രാമത്തിലെ വിദ്യാസമ്പന്നനും വാസ്തുവിദ്യ പ്രൊഫഷനായി സ്വീകരിച്ചവനുമാണ്. സമാധാനകാംഷിയായ ഇയാളെ അക്രമത്തിന്‍റെ ലോകത്തേക്ക് വിധിയുടെ അദൃശ്യ പാശത്തിനാല്‍ വലിച്ചിഴയ്‌ക്കപ്പെടുന്നു. ഒടുവില്‍ അക്രമത്തിലൂടെ തന്നെ വിജയവും നേടുന്നു.
അമേരിക്കയിലേക്കുള്ള യാത്രയ്‌ക്കിടയിലാണ് തുളസി സുന്ദരിയായ ഒരു യുവതിയുമായി (നയന് താര) പരിചയത്തില്‍ ആകുന്നത്. തുളസിയുടെ തരികിട നമ്പറുകളില്‍ വീണു പോകുന്ന യുവതി അയാളെ പ്രണയിക്കുകയും വിവാഹത്തില്‍ എത്തിച്ചേരുകയുമാണ്. അവളെ ജീവനുതുല്യം സ്നേഹിക്കുന്ന തുളസി അവള്‍ക്ക് വേണ്ടി എല്ലാം ത്യജിക്കും.
PRO
PRO
ഭാര്യയ്‌ക്ക് അക്രമം ഇഷ്ടമല്ല എന്ന ഒറ്റക്കാരണത്താലാണ് നീറുന്ന മുറിവുകള്‍ പോലും അയാള്‍ സഹിച്ചത്. ഒരു പുത്രന്‍ കൂടി ഉണ്ടായതോടെ അക്രമങ്ങളില്‍ നിന്നും പരിപൂര്‍ണ്ണമായി അയാള്‍ അകന്നു നില്‍ക്കുന്നു. ഭാര്യാ സഹോദരന്‍ മരിക്കുന്നത് വരെ ഭാര്യയുടെയും കുട്ടിയുടെയും സന്തോഷത്തിനായി അയാള്‍ ചോരയുടെ പാത വെടിഞ്ഞു നില്‍ക്കുകയായിരുന്നു. പക്ഷേ വീണ്ടും തുളസി ഘോര അടിപിടിയിലേക്ക് നീങ്ങുന്നു.
ഭാര്യാ സഹോദരനെ കൊന്നയാളെ തുളസിയും വധിക്കുന്നു. റായല്‍സീമ മുതല്‍ ബാംഗ്ലൂര്‍ വരെ നീളുന്ന ഗ്യാംഗുകളുടെ പ്രധാനിയെയായിരുന്നു തുളസി വധിച്ചത്. ഈ സംഘം പക വീട്ടാന്‍ എത്തുന്നതോടെ ചിത്രം ആദ്യ പകുതിയില്‍ നിന്നും വ്യത്യസ്തമായി സംഘട്ടനത്തിലേക്കും വയലന്‍സിലേക്കും മാറുന്നു. ഇതെല്ലാം നടക്കുന്നത് നയന്‍താരയുടെ മുന്നിലാണ്.
എന്നാല്‍ തന്‍റെ കുട്ടിയുടെ ഭാവിയും സുരക്ഷയും മുന്‍ നിര്‍ത്തി നയന്‍താര തുളസിയുമായി വേര്‍പെടുന്നു. തന്നെ ജീവനു തുല്യം സ്നേഹിക്കുന്ന തുളസിയോട് തന്നില്‍ നിന്നും അകന്ന് നില്‍ക്കാനും അവള്‍ ആവശ്യപ്പെട്ടു. ഒരമ്മയുടെ മാനസികാവസ്ഥയില്‍ നയന് ചെയ്തത് ശരിയായിരുന്നോ? തുളസിയെ പഴയ ജീവിതത്തിലേക്ക് നയന് താര തള്ളിവിടുകയാണോ? തന്‍റെ മാതാപിതാക്കളെ ഒന്നിപ്പിക്കാന്‍ കുട്ടി നടത്തുന്ന ശ്രമം വിജയിക്കുമോ? അവനതിനാകുമോ? തുടങ്ങിയ ചോദ്യങ്ങള്‍ക്ക് ഉള്ള ഉത്തരമാണ് ചിത്രം ബാക്കി ഭാഗങ്ങളില്‍ പറയുന്നത്.
ഐറ്റം ഡാന്‍സും ആക്രോശിക്കുന്ന ഒരു പറ്റം വില്ലന്‍‌മാരും ചോര മരവിപ്പിക്കുന്ന സംഘട്ടനങ്ങളും ഒഴികെ ചിത്രം ഒരു പുതുമയും നല്‍കുന്നില്ല. മുന്‍ കാലത്ത് മൊഴിമാറ്റം ചെയ്തു വന്ന ഒട്ടേറെ ചിത്രങ്ങളുടെ കഥകള്‍ ഉള്‍ക്കൊള്ളിച്ചതാണ് ചിത്രമെന്ന അഭിപ്രായമാണ് പ്രേക്ഷകരിലുയരുക. ഒന്നാം പകുതി കാര്യമായ ബഹളങ്ങള്‍ ഒന്നുമില്ലാതെ പ്രണയവും വിവാഹവും കോമഡിയുമൊക്കെയായി നീങ്ങുന്ന ചിത്രം രണ്ടാം പകുതിയിലാണ് കൂടുതല്‍ വേഗതയാര്‍ജ്ജിക്കുന്നത്.
ആക്ഷന്‍ സിനിമയെവളരെ പ്രൊഫഷണലായി സമീപിക്കുന്നയാള്‍ എന്ന നിലയില്‍ വെങ്കിടേഷ് ഏറെ അനുയോജ്യനാണ്. രണ്ടാം പകുതിയില്‍ ഗംഭീര ആക്ഷന്‍ കാണിക്കുന്ന ചിത്രത്തില്‍ ആക്ഷന്‍രംഗങ്ങളില്‍ വെങ്കിടേഷ് തിളങ്ങിയിരിക്കുന്നു. കോമഡിയിലും നല്ല ടൈമിംഗ് നിര്‍ത്താന്‍ വെങ്കിടേഷിന് കഴിയുന്നു. ചിത്രത്തില്‍ മികച്ച പ്രകടനം നടത്തുന്നത് അതുലിറ്റ് എന്ന കൊച്ചു താരമാണ്.
ഗ്ലാമറിലും അഭിനയത്തിലും ഒരു പോലെ തിളങ്ങുന്ന നയന് ചില്ലറ സെന്‍റിമെന്‍‌സുകള്‍ ഒഴിച്ചാല്‍ കാര്യമായിട്ട് ഒന്നും തന്നെ ചെയ്യാനില്ല. ഒന്നാം പകുതിയില്‍ നന്നായി ഗ്ലാമര്‍ ചെയ്യുകയും രണ്ടാം പകുതിയില്‍ മിതത്വം നല്‍കി അഭിനയിക്കുകയും ചെയ്യുന്ന നയന് വേണ്ടതില്‍ അധികം നല്‍കുന്നുണ്ട്. നായികയുടെ സഹോദരനായി ശിവജിയും ഒരു ഐറ്റം ഡാന്‍സിനായി പ്രത്യക്ഷപ്പെടുന്ന ശ്രീയയും ചെയ്യാനുള്ളത് ഭംഗിയാക്കി.
PRO
PRO
സിനിമയില്‍ പ്രത്യക്ഷപ്പെടുന്ന എട്ട് വില്ലന്‍‌മാരില്‍ ക്രൂരത കാണിക്കുന്നതില്‍ ആശിശ് വിദ്യാര്‍ത്ഥി തന്നെയാണ് മികവുറ്റ അഭിനയം നടത്തുന്നത്. രമ്യാകൃഷ്ണന്‍റെ ഡോക്ടര്‍ വേഷവും രഘു ബാബുവിന്‍റെ കോമഡി രംഗങ്ങളും നന്നാകുന്നുണ്ട്. ശ്രീ പ്രസാദിന്‍റെ പാട്ടുകളും പശ്ചാത്തല സംഗീതവും തികച്ചും ശ്രദ്ധിക്കപ്പെടും. ഛായാഗ്രഹണവും കൊള്ളാം.