ബോളിവുഡിൽ പുതിയ വിവാദങ്ങൾക്ക് തിരികൊളുത്തി അമിതാഭ് ബച്ചൻ ചിത്രം. ഗുലാബോ സിറ്റാബോയുടെ തിരക്കഥ മോഷ്ടിച്ചതാണെന്നാണ് ആരോപണം ഉയര്‍ന്നിരിക്കുന്നത്. ദേശീയ പുരസ്കാര ജേതാവും ചിത്രത്തിൻറെ തിരക്കഥാകൃത്തുമായ ജൂഹി ചതുർവേദി തിരക്കഥ മോഷ്ടിച്ചു എന്നാണ് ആരോപണം. അന്തരിച്ച തിരക്കഥാകൃത്ത് രാജീവ് അഗർവാളിന്റെ മകള്‍ അകിരയാണ് ജൂഹി ചതുർവേദിക്കെതിരെ രംഗത്തെത്തിയിരിക്കുന്നത്. ആമസോൺ പ്രൈമിലൂടെ ജൂലൈ 12ന് ചിത്രം റിലീസ് ചെയ്യാനിരിക്കെയാണ് ഇത്തരമൊരു ആരോപണം ഉയർന്നത്.
എന്നാല്‍ 2018ലെ തിരക്കഥാ മത്സരത്തിന് മുമ്പുതന്നെ ജൂഹി ചതുർവേദി സിനിമയുടെ ആശയം രജിസ്റ്റർ ചെയ്തിട്ടുണ്ടായിരുന്നുവെന്നും രാജീവ് അഗര്‍വാളിന്‍റെ തിരക്കഥ ജൂഹി വായിച്ചിട്ടില്ലെന്നും തിരക്കഥാ മത്സരത്തിന്‍റെ ഫൈനലില്‍ വന്ന തിരക്കഥകള്‍ മാത്രമേ ജൂഹി വായിച്ചിട്ടുള്ളൂവെന്നും പത്രക്കുറിപ്പിലൂടെ നിർമാതാക്കളുടെ വക്താവ് വ്യക്തമാക്കി.
