താര സംഘടന അമ്മയിൽ അടിമുടി അഴിച്ചുപണിയെന്ന് സൂചന. നിലവിലെ ഈ മാസം 24-ന് നടക്കുന്ന അമ്മ ജനറൽ ബോഡി യോഗത്തിലായിരിക്കും എല്ലാത്തിനും തീരുമാനമുണ്ടാകുക. എന്നാൽ അമ്മയുടെ പുതിയ പ്രസിഡന്റ് മോഹൻലാലായിരിക്കുമെന്നുള്ള വാർത്തകളായിരുന്നു കഴിഞ്ഞ ദിവസം മാധ്യമങ്ങളിൽ പ്രചരിച്ചിരുന്നത്. എന്നാൽ ഭാരവാഹികളെക്കുറിച്ച് അന്തിമ തീരുമാനം ആയിട്ടില്ലെന്നാണ് സെക്രട്ടറി ഇടവേള ബാബു. ഒരു ഓൺലൈൻ മാധ്യമത്തോട് പ്രതികരിക്കുകയായിരുന്നു അദ്ദേഹം.
പുതിയ ഭാരവാഹികളെ കണ്ടെത്താനാണ് ഈ മാസം അമ്മ ജനറൽ ബോഡി യോഗം വിളിച്ചിരിക്കുന്നത്. നിലവിലെ പ്രസിഡന്റായ ഇന്നസെന്റിന്റെ ആവശ്യപ്രകാരമാണ് മോഹൻലാൽ പ്രസിഡന്റ് സ്ഥാനത്തേക്ക് നോമിനേഷൻ കൊടുത്തിരിക്കുന്നതെന്നും സൂചനയുണ്ടായിരുന്നു. കഴിഞ്ഞ 17 വർഷമായി അമ്മയുടെ പ്രസിഡന്റ് ഇന്നസെന്റ് തന്നെയായിരുന്നു. ഇന്നസെന്റ് ഈ സ്ഥാനം ഒഴിയുന്നതോടുകൂടി ആരായിരിക്കും ആ സ്ഥാനത്തേക്ക് വരുന്നതെന്നുള്ള ചർച്ച കുറച്ച് ദിവസങ്ങളായി സജീവമായിരുന്നു. എല്ലാ തലമുറയിലുംപെട്ട താരങ്ങൾക്കിടയിലുള്ള പൊതുസ്വീകാര്യതയാണ് മോഹൻലാലിനെ ഈ സ്ഥാനത്തേക്ക് കൊണ്ടുവരാൻ ഇന്നസെന്റിനെ പ്രേരിപ്പിച്ചതെന്നും റിപ്പോർട്ടുണ്ടായിരുന്നു.
