മമ്മൂട്ടിയെ നായകനാക്കി സന്തോഷ് ശിവന്‍ സംവിധാനം ചെയ്യാനിരുന്ന ‘കുഞ്ഞാലിമരക്കാര്‍’ ഉപേക്ഷിച്ചതായി സൂചന. വന്‍ ബജറ്റില്‍ ഒരുക്കാനിരുന്ന സിനിമയെക്കുറിച്ച് ഇപ്പോള്‍ ഒരു വിവരവുമില്ല. മോഹന്‍ലാല്‍ - പ്രിയദര്‍ശന്‍ ടീം ‘മരക്കാര്‍: അറബിക്കടലിന്‍റെ സിംഹം’ പ്രഖ്യാപിച്ചതോടെ മമ്മൂട്ടിച്ചിത്രം വരാനുള്ള സാധ്യത വളരെക്കുറഞ്ഞു.
വമ്പന്‍ ബജറ്റില്‍ കുഞ്ഞാലിമരക്കാര്‍ ആരംഭിക്കാന്‍ വൈകുമെന്നതാണ് മമ്മൂട്ടിച്ചിത്രത്തിന് വിനയായത്. മാത്രമല്ല സംവിധായകന്‍ സന്തോഷ് ശിവന്‍റെ തിരക്കും പ്രൊജക്ടിന് കുഴപ്പമായി. ഇപ്പോള്‍ മണിരത്നത്തിന്‍റെ ‘ചൊക്കച്ചിവന്ത വാനം’ എന്ന സിനിമയുടെ ഛായാഗ്രഹണം നിര്‍വഹിച്ചുവരികയാണ് സന്തോഷ് ശിവന്‍. മാത്രമല്ല, താന്‍ അടുത്തതായി സംവിധാനം ചെയ്യുന്ന ചിത്രം കുഞ്ഞാലിമരക്കാര്‍ അല്ലെന്ന് സന്തോഷ് ശിവന്‍ കഴിഞ്ഞ ദിവസം പറഞ്ഞിരുന്നു.
