2025 മാര്‍ച്ച് 27 നാണ് എംപുരാന് വേള്‍ഡ് വൈഡായി തിയറ്ററുകളിലെത്തുന്നത്. മുരളി ഗോപിയുടെ തിരക്കഥയില്‍ പൃഥ്വിരാജ് സംവിധാനം ചെയ്യുന്ന ചിത്രത്തില്‍ മോഹന്‍ലാലിനൊപ്പം മറ്റൊരു തെന്നിന്ത്യന്‍ സൂപ്പര്‍താരവും പ്രധാന വേഷത്തിലെത്തുമെന്നാണ് റിപ്പോര്‍ട്ടുകള്‍. ആ നടന്‍ ആരായിരിക്കുമെന്ന കാര്യത്തില്‍ ഇതുവരെ വ്യക്തത ലഭിച്ചിട്ടില്ല. അണിയറ പ്രവര്‍ത്തകര്‍ അതീവ രഹസ്യമായി വെച്ചിരിക്കുന്ന 'സര്‍പ്രൈസ്' താരത്തെ അന്വേഷിക്കുകയാണ് സോഷ്യല്‍ മീഡിയ.
കേരളപ്പിറവിയോടു അനുബന്ധിച്ച് എംപുരാന്റെ അണിയറ പ്രവര്‍ത്തകര്‍ പുറത്തുവിട്ട റിലീസ് പോസ്റ്ററില്‍ ഒരാള്‍ പിന്‍തിരിഞ്ഞ് നില്‍ക്കുന്നത് കാണാം. ഈ നില്‍ക്കുന്ന ആളാണ് എംപുരാനിലെ സര്‍പ്രൈസ് താരമെന്നാണ് ആരാധകര്‍ കണ്ടെത്തിയിരിക്കുന്നത്. പോസ്റ്ററിലുള്ള താരത്തിന്റെ പിന്നില്‍ ഒരു ഡ്രാഗണ്‍ ചിത്രം കാണാം. മാത്രമല്ല പോസ്റ്ററിലേക്ക് സൂക്ഷിച്ചു നോക്കിയാല്‍ മോഹന്‍ലാലിന്റെ മുഖവും കാണാന്‍ സാധിക്കും.
പോസ്റ്ററില്‍ തിരിഞ്ഞു നില്‍ക്കുന്ന താരം ഫഹദ് ഫാസില്‍ ആണെന്നാണ് സോഷ്യല്‍ മീഡിയയുടെ കണ്ടെത്തല്‍. ബോഡി ലാംഗ്വേജ് ശ്രദ്ധിച്ചാണ് ആരാധകര്‍ ഇങ്ങനെയൊരു നിഗമനത്തിലേക്ക് എത്തിയിരിക്കുന്നത്. എന്നാല്‍ എംപുരാനില്‍ ഫഹദ് അഭിനയിച്ചിട്ടില്ല. പിന്നെ ആരാണ് പോസ്റ്ററിലുള്ളത്?
മൂന്ന് ഭാഗങ്ങളാണ് ലൂസിഫറിനുള്ളത്. എംപുരാന് രണ്ടാം ഭാഗമാണ്. എംപുരാന് ശേഷം ഒരു ഭാഗം കൂടി വരാനിരിക്കുന്നുണ്ട്. അതുകൊണ്ട് തന്നെ രണ്ടാം ഭാഗമായ എംപുരാനില്‍ വന്‍ സര്‍പ്രൈസുകള്‍ പ്രതീക്ഷിക്കാം. തെന്നിന്ത്യയില്‍ നിന്നുള്ള ഒരു സൂപ്പര്‍താരമാണ് പോസ്റ്ററിലുള്ളതെന്നാണ് സൂചന. തമിഴില്‍ നിന്നുള്ള നടനാണെന്നും റിപ്പോര്‍ട്ടുകള്‍ ഉണ്ട്. ആരാണെന്ന് അറിയണമെങ്കില്‍ ചിത്രത്തിന്റെ റിലീസ് വരെ കാത്തിരിക്കണം.