സിനിമ-സീരിയല്‍ താരം രഞ്ജുഷ മേനോന്റെ ആത്മഹത്യയില്‍ നടുങ്ങി സഹതാരങ്ങള്‍. തന്റെ 35-ാം ജന്മദിനത്തിലാണ് രഞ്ജുഷ ആത്മഹത്യ ചെയ്തത്. ഒക്ടോബര് 30 തിങ്കളാഴ്ച രാവിലെ തിരുവനന്തപുരം ശ്രീകാര്യം കരിയത്തെ ഫ്‌ളാറ്റില്‍ രഞ്ജുഷയെ തൂങ്ങി മരിച്ച നിലയില്‍ കണ്ടെത്തുകയായിരുന്നു. സീരിയല്‍ രംഗത്തു പ്രവര്‍ത്തിക്കുന്ന സുഹൃത്ത് മനോജ് ശ്രീലകവുമായി ഒന്നിച്ചായിരുന്നു രഞ്ജുഷയുടെ താമസം.
താമസിക്കുന്ന ഫ്‌ളാറ്റിലെ വാതില്‍ പൂട്ടിയിരുന്നതിനാല്‍ താഴെയിറങ്ങി സെക്യൂരിറ്റി ജീവനക്കാരന്റെ സഹായത്തോടെ ഏണി വച്ച് ഫ്‌ളാറ്റിന്റെ പിന്‍വശത്ത് കൂടി കയറി വാതില്‍ തുറന്നു നോക്കിയപ്പോള്‍ ആണ് രഞ്ജുഷയെ മരിച്ച നിലയില്‍ കണ്ടത്. ഫാനില്‍ കുരുക്കിട്ട് തൂങ്ങി മരിച്ച നിലയിലായിരുന്നു. ഫാനില്‍ നിന്ന് നിലത്തിറക്കി പരിശോധിക്കുമ്പോള്‍ മരണം സംഭവിച്ചിരുന്നെന്നും മനോജ് പൊലീസിനു നല്‍കിയ മൊഴിയില്‍ പറയുന്നു.
സിറ്റി ഓഫ് ഗോഡ്, മേരിക്കുണ്ടൊരു കുഞ്ഞാട്, ലിസമ്മയുടെ വീട്, ബോംബെ മാര്‍ച്ച് 12, തലപ്പാവ്, വാധ്യാര്‍, വണ്‍വേ ടിക്കറ്റ്, കാര്യസ്ഥന്‍, അത്ഭുതദ്വീപ് തുടങ്ങിയ സിനിമകളില്‍ അഞ്ജുഷ അഭിനയിച്ചിട്ടുണ്ട്. മകളുടെ അമ്മ, സ്ത്രീ, ആനന്ദരാഗം, വരന്‍ ഡോക്ടറാണ്, എന്റെ മാതാവ് തുടങ്ങിയവയാണ് രഞ്ജുഷയുടെ ശ്രദ്ധേയമായ സീരിയലുകള്‍.
