സുകുമാര്‍ അഴീക്കോടിനെതിരെ സംവിധായകനും നടനുമായ വേണു നാഗവള്ളി രംഗത്തെത്തി. സിനിമാ താരങ്ങള്‍ക്കെതിരെ ആരോപണങ്ങള്‍ ഉന്നയിക്കുകയും പരസ്യമായി അപവാദപ്രചരണങ്ങള്‍ നടത്തുകയും ചെയ്യുന്ന സുകുമാര്‍ അഴീക്കോടിന് അതേ നാണയത്തില്‍ മറുപടി പറയാത്തത് സംസ്കാരമുള്ളതുകൊണ്ടാണെന്ന് വേണു നാഗവള്ളി പറഞ്ഞു.
“സിനിമാ താരങ്ങളെയും മറ്റ് ചലച്ചിത്ര പ്രവര്‍ത്തകരെയും അപമാനിക്കുകയാണ് സുകുമാര്‍ അഴീക്കോട്. ഇതിനൊക്കെ മറുപടി നല്‍കാനുള്ള നാക്കും വാക്കും സിനിമാരംഗത്തുള്ളവര്‍ക്ക് ഉണ്ട്. എന്നാല്‍ അതിനു തുനിയാത്തത് മഹത്തായ സാംസ്കാരിക പാരമ്പര്യം ഉള്‍ക്കൊള്ളുന്നതുകൊണ്ടാണ്” - വേണു നാഗവള്ളി വ്യക്തമാക്കി.
“കൊടിയേറ്റത്തിന് ശേഷം ഒരു സിനിമ കണ്ടിട്ടില്ലെന്നാണ് അഴീക്കോട് പറയുന്നത്. അതിനു ശേഷമുള്ള മലയാള സിനിമയെക്കുറിച്ച് അഴീക്കോടിന് ഒന്നും അറിയില്ല. അങ്ങനെയുള്ള സാഹചര്യത്തില്‍ അഴീക്കോട് നടത്തുന്ന പ്രസ്താവനകള്‍ അപലപനീയമാണ്” - വേണു നാഗവള്ളി പറഞ്ഞു.
മോഹന്‍ലാല്‍ ഉള്‍പ്പടെയുള്ള സിനിമാതാരങ്ങളെ വിമര്‍ശിക്കുന്നത് അഴീക്കോട് തുടരുന്ന സാഹചര്യത്തിലാണ് അഴീക്കോടിനെതിരെ വേണു നാഗവള്ളി രംഗത്തെത്തിയിരിക്കുന്നത്.