അക്ഷയ് കുമാറിനെ റൊമാന്‍റിക് സിനിമകള്‍ പിടികൂടുകയാണോ? സമീപകാല ചിത്രങ്ങള്‍ സംബന്ധിച്ച കാര്യങ്ങള്‍ പരിശോധിച്ചാല്‍ ഇക്കാര്യം വ്യക്തമാകും. ആക്ഷന്‍ ചിത്രങ്ങളിലൂടെ ബോളീവുഡില്‍ അരങ്ങേറ്റം നടത്തിയ മാര്‍ഷല്‍ ആട്സ് വിദഗ്‌ദന്‍ കൂടിയായ അക്ഷയ് കുമാറിനു ആക്ഷന്‍ നായകനെന്ന പരിവേഷം ലഭിക്കാന്‍ ഏറെ സമയം വേണ്ടി വന്നില്ല.
എന്നാല്‍ അടുത്ത കാലത്ത് അക്ഷയ് കുമാറിനെ വിജയം നല്‍കി അനുഗ്രഹിച്ച ചിത്രങ്ങളെല്ലാം റോമാന്‍റിക് കോമഡികളായിരുന്നു. ലണ്ട്ന്‍, ഹേ ബേബി, ഫൂല്‍ ഫൂലയ്യ, വെല്‍ക്കം എന്നിങ്ങനെ കഴിഞ്ഞ വര്‍ഷം അക്കിയുടേതായി ഹിറ്റായ നാലു ചിത്രങ്ങളില്‍ ഫൂല്‍ ഫൂലയ്യ ഒഴികെയുള്ള ചിത്രങ്ങള്‍ പ്രണയ-തമാശ ചിത്രങ്ങളായിരുന്നു.
ഈ ചിത്രങ്ങളിലൂടെ ആക്ഷന്‍ നായകനില്‍ നിന്നും കോമഡി സൂപ്പര്‍ താരത്തിലേക്ക് ചുവടുമാറ്റം നടത്താന്‍ അക്ഷയ് കുമാറിനു കഴിഞ്ഞിരിക്കുകയാണ്. ബാസിഗര്‍ പോലുള്ള വമ്പന്‍ ഹിറ്റുകള്‍ ബോളീവുഡിനു സമ്മാനിച്ച അബ്ബാസ്-മസ്താന്‍ അടുത്തതായി ഒരുക്കുന്ന തമാശ ചിത്രത്തിലും നായകന്‍ അക്ഷയ് കുമാറാണ്.
അവരുടെ പുതിയ നിര്‍മ്മാണക്കമ്പനിക്കായി തയ്യാറാകുന്നത് രണ്ട് ചിത്രങ്ങളാണ്. ഒന്ന് റൊമാന്‍റിക് കോമഡിയും മറ്റൊന്ന് ആക്ഷന്‍ ചിത്രവും. ഇതില്‍ റൊമാന്‍റിക് കോമഡിയിലെ നായകന്‍ അക്ഷയ് കുമാറാണ്. രണ്ടിന്‍റെയും സ്ക്രിപ്റ്റ് തയ്യാറായി കഴിഞ്ഞിരിക്കുകയാണ്. എന്നാല്‍ ഏതെങ്കിലും ഇമേജില്‍ കുടുങ്ങിക്കിടക്കാന്‍ അക്ഷയ്ക്ക് താല്പര്യമില്ല. അതു കൊണ്ട് തന്നെ അബ്ബാസ്-മസ്താന്‍റെ ആക്ഷന്‍ സിനിമയില്‍ അക്കിക്കു താല്പര്യവുമില്ല.
അക്ഷയ് കുമാറിനെ ആക്ഷനായി ഒട്ടേറെ സിനിമകളില്‍ പ്രയോജനപ്പെടുത്തിയിട്ടുള്ള അബ്ബാസ് മസ്താന്‍ ഇത്തവണ വ്യത്യസ്തമായ ഒരു വേഷം നല്‍കാനാണ് ആഗ്രഹിക്കുന്നത്. കഴിഞ്ഞ വര്‍ഷം ബോളീവുഡില്‍ സൂപ്പര്‍ ഹിറ്റുകള്‍ കണ്ടെത്തിയ രണ്ടു നടന്‍‌മാര്‍ ഷാരൂഖും അക്ഷയുമായിരുന്നു. ചക്ക് ദേയും ഓം ശാന്തി ഓമുമായിരുന്നു ഷാരൂഖിന്‍റെ വിജയ ചിത്രങ്ങള്‍.