കൊല്ലപ്പെട്ട യുവാവും പെൺകുട്ടിയും പ്രണയത്തിലായിരുന്നു, ആലപ്പുഴയിലെ കൊലപാതകത്തിനു പിന്നിലെ യഥാർത്ഥ കാരണമെന്ത്?
തിങ്കള്‍, 18 ഫെബ്രുവരി 2019 (17:42 IST)
മകളെ ശല്യപ്പെടുത്തിയെന്നാരോപിച്ച് ആലപ്പുഴ വാടയ്ക്കൽ അറുകൊലശേരിയിൽ സാബുവിന്റെ മകൻ കുര്യാക്കോസ് എന്ന സജിയെ (20) വാടയ്ക്കൽ വേലിയകത്തു വീട്ടിൽ സോളമൻ (45) കുത്തിക്കൊന്ന വാർത്ത ഏറെ ഞെട്ടലോടെയാണ് കേരളം അറിഞ്ഞത്.
എന്നാൽ, സോളമന്റെ മകളും കൊല്ലപ്പെട്ട കുര്യാക്കോസും തമ്മിൽ പ്രണയത്തിലായിരുന്നുവെന്നും ഇതറിഞ്ഞ സോളമൻ കലിമൂത്ത് യുവാവിനെ കൊലപ്പെടുത്തുകയുമായിരുന്നുവെന്ന് സോഷ്യൽ മീഡിയകളിൽ ഒരു വിഭാഗം പറയുന്നു.
സംഭവത്തിൽ സോളമനെ പുന്നപ്ര പൊലീസ് കസ്റ്റഡിയിൽ എടുത്തു. മരിച്ച സജിയും കസ്റ്റഡിയിലായ സോളമനും ബന്ധുക്കളാണ്. ഞായറാഴ്ച ഉച്ചയോടെയാണു കുര്യാക്കോസിനെ സോളമൻ ആക്രമിച്ചത്. സോളമന്റെ മകളെ കുര്യാക്കോസ് ശല്യപ്പെടുത്തുകയും പ്രണയാഭ്യർഥന നടത്തുകയും ചെയ്തിരുന്നുവെന്നാണ് സംഭവത്തിൽ പൊലീസ് പറയുന്നത്.
പലതവണ താക്കീത് നൽകിയെങ്കിലും ശല്യപ്പെടുത്തൽ തുടർന്നെന്നാണ് സോളമൻ പൊലീസിനു നൽകിയ മൊഴി. ഞായറാഴ്ചയും പെൺകുട്ടിയുമായി കുര്യാക്കോസ് സംസാരിക്കുന്നതു കണ്ട സോളമൻ ആക്രമിക്കുകയായിരുന്നു.
