കോഴിക്കോട്: കടയുടെ തിണ്ണയില്‍ ഉറങ്ങിക്കിടന്ന യുവാവിനെ തലക്കടിച്ച് കൊലപ്പെടുത്തിയ കേസില്‍ തമിഴ്നാട് സ്വദേശി പിടിയിലായി. മാങ്കാവ് സ്വദേശി ഇയ്യക്കണ്ടി മുഹമ്മദ് ഷാഫി (36) ആണ് മരിച്ചത്.
സംഭവത്തില്‍ തമിഴ്നാട് അരിയല്ലൂര്‍ സ്വദേശി വരദരാജന്‍ പേട്ടയിലെ ആന്റണി ജോസഫിനെ (49) പോലീസ് അറസ്റ്റ് ചെയ്തു. കസബ പൊലീസ് ആണ് പ്രതിയെ അറസ്റ്റു ചെയ്തത്.
കഴിഞ്ഞ ദിവസം സന്ധ്യയോടെ മാങ്കാവിലാണ് സംഭവം. രാത്രി ഏഴോടെ അങ്ങാടിയിലെ ലാബിന് മുന്‍വശം കിടന്നുറങ്ങിയ യുവാവിനെ ആന്റണി ജോസഫ് നിലത്തുവിരിക്കുന്ന ഇന്റര്‍ലോക്ക് കട്ടകൊണ്ട് തലക്കടിക്കുകയായിരുന്നു. ചോരവാര്‍ന്ന് ബോധം നഷ്ടമായതോടെ പ്രതി സ്ഥലത്തുനിന്ന് രക്ഷപ്പെട്ടു. പിന്നീട് അതുവഴി പോയവരാണ് ഷാഫിയെ ചോരവാര്‍ന്ന് ബോധരഹിതനായ നിലയില്‍ കണ്ടതും മെഡിക്കല്‍ കോളജ് ആശുപത്രിയിലെത്തിക്കുകയും ചെയ്തത്.
വിവരം പൊലീസില്‍ അറിയിക്കുകയും ചെയ്തു. എന്നാല്‍ ചികിത്സക്കിടെ കഴിഞ്ഞ രാത്രി ഷാഫി മരിച്ചു. മാങ്കാവില്‍ തന്നെ പല ജോലികളുമായി കഴിയുന്ന ആന്റണി ജോസഫിനെ തിങ്കളാഴ്ച കസബ ഇന്‍സ്പെക്ടര്‍ രാജേഷ് മാരാംഗലത്താണ് അറസ്റ്റുചെയ്തത്.
കൊലപാതകത്തിനുള്ള കാരണം അറിവായിട്ടില്ല. ഹസന്‍ -ആയിഷബി ദമ്പതികളുടെ മകനാണ് ഷാഫി. സഹോദരങ്ങള്‍: അബ്ദുല്‍ സമദ്, മുഹമ്മദ് ഷരീഫ്, സാബിത, ഫാസില