ഇന്ത്യ- പാകിസ്ഥാന്‍ മത്സരങ്ങള്‍ എക്കാലവും ആവേശകരമായ മത്സരങ്ങളാണ്. എന്നാല്‍ കഴിഞ്ഞ കുറച്ച് വര്‍ഷങ്ങളിലായി പാകിസ്ഥാന്‍ ക്രിക്കറ്റ് ദയനീയമായ സ്ഥിതിയിലാണ്. കഴിഞ്ഞ ടി20 ലോകകപ്പില്‍ അമേരിക്കയോട് പോലും തോറ്റ് നാണം കെട്ട പാകിസ്ഥാന്‍ തിരിച്ചുവരവിന്റെ ഒരു സൂചനയും നല്‍കുന്നില്ല എന്നതിനാല്‍ തന്നെ ഇത്തവണ ചാമ്പ്യന്‍സ് ട്രോഫിയില്‍ ഇരു ടീമുകളും ഏറ്റുമുട്ടിയപ്പോള്‍ ഇന്ത്യയ്ക്ക് ഒരു വെല്ലുവിളി പോലും ഉയര്‍ത്താന്‍ പാക് ടീമിനായില്ല.
പാകിസ്ഥാന്‍ ഉയര്‍ത്തിയ 242 റണ്‍സ് വിജയലക്ഷ്യം 7 ഓവറുകള്‍ ബാക്കിനില്‍ക്കെയാണ് ഇന്ത്യ മറികടന്നത്. കാര്യങ്ങള്‍ ഇങ്ങനെയെല്ലാമാണെങ്കിലും മത്സരത്തില്‍ ശൂഭ്മാന്‍ ഗില്ലിനെ പുറത്താക്കികൊണ്ട് പാക് സ്പിന്നര്‍ അബ്‌റാര്‍ അഹമ്മദ് നടത്തിയ ആഹ്‌ളാദ പ്രകടനമാണ് ആരാധകരെ ചൊടുപ്പിച്ചത്. പാകിസ്ഥാനെതിരെ നല്ല രീതിയില്‍ കളിച്ചുകൊണ്ടിരിക്കെയാണ് അബ്‌റാറിന്റെ പന്തില്‍ ഗില്‍ മടങ്ങിയത്. ഇതിന് പിന്നാലെ ഗില്ലിനെ പരിഹസിക്കുന്ന രീതിയിലുള്ള ആഹ്‌ളാദപ്രകടനമാണ് അബ്‌റാര്‍ നടത്തിയത്.