ലോക ടെസ്റ്റ് ചാംപ്യന്‍ഷിപ്പ് ഫൈനല്‍ ലക്ഷ്യമിട്ട് ഇന്ത്യ ബോര്‍ഡര്‍-ഗാവസ്‌കര്‍ ട്രോഫിയിലെ അവസാന ടെസ്റ്റില്‍ ഓസ്‌ട്രേലിയയെ നേരിടുകയാണ്. ഓസ്‌ട്രേലിയയ്‌ക്കെതിരായ നാലാം ടെസ്റ്റില്‍ വിജയം നേടിയാല്‍ ഇന്ത്യക്ക് ലോക ടെസ്റ്റ് ചാംപ്യന്‍ഷിപ്പ് ഫൈനലില്‍ പ്രവേശിക്കാം. അതേസമയം നാലാം ടെസ്റ്റ് സമനിലയിലാകുകയോ തോല്‍ക്കുകയോ ചെയ്താല്‍ ശ്രീലങ്ക-ന്യൂസിലന്‍ഡ് മത്സരഫലത്തെ ആശ്രയിച്ചിരിക്കും ഇന്ത്യയുടെ വിധി. ന്യൂസിലന്‍ഡിനെതിരായ പരമ്പരയില്‍ ശ്രീലങ്ക 2-0 ത്തിന് ജയിക്കുകയും ഓസ്‌ട്രേലിയയ്‌ക്കെതിരായ നാലാം ടെസ്റ്റില്‍ ഇന്ത്യ തോല്‍ക്കുകയും ചെയ്താല്‍ ശ്രീലങ്കയായിരിക്കും ലോക ടെസ്റ്റ് ചാംപ്യന്‍ഷിപ്പ് ഫൈനലില്‍ പ്രവേശിക്കുക.
ന്യൂസിലന്‍ഡിനെതിരായ ആദ്യ ടെസ്റ്റില്‍ മികച്ച നിലയില്‍ ബാറ്റ് ചെയ്യുകയാണ് ശ്രീലങ്ക ഇപ്പോള്‍. ഒന്നാം ദിനം കളി നിര്‍ത്തുമ്പോള്‍ 75 ഓവറില്‍ ആറ് വിക്കറ്റ് നഷ്ടത്തില്‍ ശ്രീലങ്ക 305 റണ്‍സ് എടുത്തിട്ടുണ്ട്. കുശാല്‍ മെന്‍ഡിസ് 83 പന്തില്‍ 87 റണ്‍സും ദിമുത് കരുണരത്‌നെ 87 പന്തില്‍ 50 റണ്‍സും നേടി. ആഞ്ചലോ മാത്യൂസ് (98 പന്തില്‍ 47), ദിനേശ് ചാണ്ഡിമല്‍ (64 പന്തില്‍ 39) എന്നിവരും ഭേദപ്പെട്ട പ്രകടനം കാഴ്ചവെച്ചു. 52 പന്തില്‍ 39 റണ്‍സുമായി ധനഞ്ജയ ഡി സില്‍വ ക്രീസിലുണ്ട്. ന്യൂസിലന്‍ഡിനെ വിറപ്പിച്ച് ഇന്ത്യക്ക് പണി കൊടുക്കുമോ ശ്രീലങ്ക എന്നാണ് എല്ലാവരും ഉറ്റുനോക്കുന്നത്.
