അന്ന് ‘സെക്‍സ് പാര്‍ട്ടി’, ഇപ്പോള്‍ അമിതവേഗം; വോണ്‍ വീണ്ടും വിവാദത്തില്‍ - നടപടി സ്വീകരിച്ച് കോടതി
സ്വകാര്യ ജീവിതത്തിലും ക്രിക്കറ്റിലും എന്നും വിവാദങ്ങള്‍ കൂടെ കൊണ്ടു നടന്ന താരമാണ് ഓസ്‌ട്രേലിയന്‍ സ്‌പിന്‍ ഇതിഹാസം ഷെയ്‌ന്‍ വോണ്‍. സ്‌ത്രീ വിഷയം മുതല്‍ ലഹരിമരുന്ന് ഉപയോഗം വരെ താരത്തിന്റെ പേരിന് കളങ്കം ചാര്‍ത്തി.
വോണ്‍ വീട്ടില്‍ ‘സെക്‍സ് പാര്‍ട്ടി’ നടത്തി വിവാദത്തിലായത് ആഴ്‌ചകള്‍ക്ക് മുമ്പാണ്. ഈ സംഭവത്തില്‍ പൊലീസ് അന്വേഷണം നടക്കുകയാണെന്നാണ് റിപ്പോര്‍ട്ട്. എന്നാല്‍, റോഡിലെ അമിത വേഗത കാരണം വോണ്‍ വീണ്ടും വാര്‍ത്തകളില്‍ നിറയുകയാണ്.
പതിവായി അമിത വേഗത്തില്‍ അപകടകരമായ രീതിയില്‍ വാഹനം ഓടിക്കുന്നതായി ശ്രദ്ധയില്‍ പെട്ടതോടെ വോണിനെ വാഹനമോടിക്കുന്നതില്‍ നിന്ന് കോടതി വിലക്കി.
കഴിഞ്ഞ രണ്ടു വര്‍ഷത്തിനിടെ ആറു തവണയാണ് വോണ്‍ ഓവര്‍ സ്പീഡിന് പിടിയിലായത്. ഇതോടെ മുന്‍ താരത്തിന് ഇനി 12 മാസം സ്റ്റിയറിങ് പിടിക്കാന്‍ അനുമതിയില്ല. വെസ്‌റ്റ് ലണ്ടനില്‍ സ്ഥിരതാമസമാക്കിയ വോണിനെതിരെ മുമ്പും സമാനമായ കേസുകള്‍ ചുമത്തപ്പെട്ടിരുന്നു.
