സൂര്യ, സൂര്യകുമാർ യാദവായി മാറുന്നത് ഒപ്പം നടന്ന് കണ്ടതാണ്, ഞാൻ സെഞ്ചുറിയടിച്ചതിൽ എന്നേക്കാളും സന്തോഷിച്ചത് അവൻ: സഞ്ജു സാംസൺ
ബംഗ്ലാദേശിനെതിരെ നടന്ന ടി20 സീരീസിന്റെ അവസാന ടി20 മത്സരത്തില്‍ തകര്‍പ്പന്‍ പ്രകടനമായിരുന്നു മലയാളി താരമായ സഞ്ജു സാംസണ്‍ നടത്തിയത്. സെഞ്ചുറിപ്രകടനത്തിനിടയിലും സഞ്ജു- സൂര്യകുമാര്‍ ജോഡി നടത്തിയ വെടിക്കെട്ട് പ്രകടനത്തെ അഭിനന്ദിക്കുന്നവര്‍ ഏറെയാണ്. രണ്ടുപേരും തമ്മില്‍ തകര്‍പ്പന്‍ കെമിസ്ട്രിയാണ് ഉള്ളതെന്നും ഇരുവരും ഒരുമിച്ച് ബാറ്റ് ചെയ്യുന്നത് കാണാന്‍ തന്നെ ഭംഗിയാണെന്നും ഒട്ടെറെ പേര്‍ വ്യക്തമാക്കിയിരുന്നു. മാത്രമല്ല സഞ്ജു സെഞ്ചുറി നേടിയപ്പോള്‍ സൂര്യ അടുത്തെത്തി കെട്ടിപിടിക്കുകയും സഞ്ജു പുറത്തായ ശേഷം തോളില്‍ കയ്യിട്ട് സംസാരിക്കുകയും ചെയ്തിരുന്നു. ഇതോടെ സഞ്ജു- സൂര്യ കോമ്പോയെ ആരാധകരും ഏറ്റെടുത്തിരിക്കുകയാണ്.
ഞാനും സൂര്യയും വര്‍ഷങ്ങളായുള്ള ബന്ധമാണ്. ജൂനിയര്‍ തലം തൊട്ടെ സൂര്യയെ അറിയാം. ഞങ്ങള്‍ വര്‍ക്ക് ചെയ്തിരുന്നതും ഒരുമിച്ചാണ്. ബിപിസിഎല്ലിനായും ഇന്ത്യ എ ടീമിനായും സൂര്യയ്‌ക്കൊപ്പം കളിച്ചിട്ടുണ്ട്. സൂര്യ എങ്ങനെ സൂര്യകുമാര്‍ യാദവായി എന്നത് ഞാന്‍ ഒപ്പം നടന്ന് കണ്ടതാണ്. ഉള്ളത് പോലെ കാര്യങ്ങള്‍ പറയുകയും കളിക്കാരെ പിന്തുണയ്ക്കുകയും ചെയ്യുന്ന ക്യാപ്റ്റനാണ് സൂര്യ. എല്ലാ കളിക്കാരെയും പിന്തുണയ്ക്കുന്ന നായകന്‍. ഞാന്‍ സെഞ്ചുറിയടിച്ചപ്പോള്‍ എന്നേക്കാള്‍ സന്തോഷം സൂര്യയ്ക്കായിരുന്നു. സെഞ്ചുറിയടിച്ച ശേഷം ഞാന്‍ ഹെല്‍മെറ്റ് അഴിക്കണോ എന്ന് സംശയിച്ച് നിന്നപ്പോള്‍ തൊട്ടപ്പുറത്ത് സൂര്യ ഹെല്‍മെറ്റൊക്കെ അഴിച്ച് എന്റെ നേര്‍ക്ക് വരികയായിരുന്നു. അങ്ങനെ ഒരു നായകനെ കിട്ടാന്‍ ഭാഗ്യം ചെയ്യണം. ഏറെ സന്തോഷമാണ് ഇതെല്ലാം. സഞ്ജു പറഞ്ഞു.
