ധോണി ഉടന്‍ അറസ്റ്റിലാകും; പണത്തിനു വേണ്ടി എന്തു കോപ്രായവും കെട്ടുന്നു എന്ന് കോടതി

ഇന്ത്യന്‍ ക്രിക്കറ്റ് ക്യാപ്ടന്‍ മഹേന്ദ്ര സിംഗ് ധോണി ഉടന്‍ അറസ്റ്റിലാകുമെന്ന് സൂചന. ധോണിയെ ഈ മാസം 25നകം അറസ്റ്റ് ചെയ്യണമെന്നാണ് കോടതി ഉത്തരവ്. ഹിന്ദുവികാരം വ്രണപ്പെടുത്തിയെന്ന കുറ്റത്തിനാണ് കോടതി ധോണിയെ അറസ്റ്റ് ചെയ്യാന്‍ ഉത്തരവിട്ടിരിക്കുന്നത്.

ആന്ധ്രാപ്രദേശിലെ അനന്ത്‌പൂര്‍ കോടതിയാണ് ധോണിക്കെതിരെ ഉത്തരവ് പുറപ്പെടുവിച്ചിരിക്കുന്നത്. ആന്ധ്രയിലെ ഒരു വി എച്ച് പി നേതാവ് നല്‍കിയ ഹര്‍ജിയിലാണ് കോടതിയുടെ ഉത്തരവ്.

ബിസിനസ് ടുഡേ മാഗസിന്‍റെ കവര്‍ പേജില്‍ ധോണി മഹാവിഷ്ണുവിന്റെ രൂപത്തില്‍ പ്രത്യക്ഷപ്പെട്ടതിനെതിരെയാണ് വി എച്ച് പി നേതാവ് കോടതിയെ സമീപിച്ചത്. പണത്തിനു വേണ്ടി എന്തു കോപ്രായവും കെട്ടുന്ന പ്രവണത കൂടി വരികയാണെന്ന് ധോണിയുടെ ചിത്രത്തെ പരാമര്‍ശിച്ച് കര്‍ണാടക ഹൈക്കോടതി അഭിപ്രായപ്പെട്ടിരുന്നു.

മഹാവിഷ്ണുവിന്‍റെ രൂപത്തില്‍ പെപ്സിയും ലെയ്സും ദാബര്‍ ച്യവനപ്രാശവും ബൂസ്റ്റുമൊക്കെ പിടിച്ചുനില്‍ക്കുന്ന ധോണിയുടെ ചിത്രം വന്‍ വിവാദത്തിനാണ് കാരണമായത്. ഇത്തരം പരസ്യങ്ങളില്‍ അഭിനയിക്കുമ്പോള്‍ അതിനുപിന്നിലെ പ്രശ്നങ്ങളെക്കുറിച്ചും സെലിബ്രിറ്റികള്‍ ബോധവാന്‍‌മാരായിരിക്കണമെന്നും കര്‍ണാടക കോറ്റതി പറഞ്ഞിരുന്നു. 

ഓസ്ട്രേലിയന്‍ പര്യടനവുമായി ബന്ധപ്പെട്ട് ധോണീ ഇപ്പോള്‍ ഓസ്ട്രേലിയയിലാണുള്ളത്. 31 വരെ പര്യടനം നീളും. എന്നാല്‍ 25നകം ധോണിയെ അറസ്റ്റ് ചെയ്യാനാണ് ഉത്തരവിട്ടിരിക്കുന്നത്. പര്യടനത്തിനിടെ കേസിന്‍റെ ആവശ്യത്തിനായി ധോണി ഇന്ത്യയിലേക്ക് മടങ്ങുമോ എന്നാണ് ആരാധകര്‍ ഉറ്റുനോക്കുന്നത്.