ഡൽഹി: രാജ്യത്ത് കോവിഡ് 19 പടർന്നുപിടിക്കുന്ന സാഹചര്യത്തിൽ വിദേശ രാജ്യങ്ങളിൽനിന്നും ഇന്ത്യയിലേക്കുള്ള യാത്രകൾക്ക് വിലക്കേർപ്പെടുത്തി കേന്ദ്ര സർക്കാർ. കോറോണ വൈറസ് ബാധ ഇല്ലെന്ന മെഡിക്കൽ റിപ്പോർട്ട് ഉള്ളവർക്ക് മത്രമേ ഇന്ത്യയിലേക്ക് പ്രവേശിക്കാനാകു. കോവിഡ് 19 ബാധയെ തുടർന്ന് യുദ്ധസമനമായ സാഹചര്യം നിലനിൽക്കുന്നതിനാലാണ് ഇത്തരമൊരു നടപടി എന്ന് കേന്ദ്ര വിദേശകാര്യ സഹമന്ത്രി വി മുരളീധരൻ പറഞ്ഞു.
ഇറ്റലിയിൽ കുടുങ്ങിക്കിടക്കുന്ന മലയാളികൾ ഉൾപ്പടെയുള്ള ഇന്ത്യക്കാരെ പരിശോധിക്കന്നതിനായി പ്രത്യേക മെഡിക്കൽ സംഘത്തെ അയക്കും. ഇവരിൽ വൈറസ് ബാധയില്ലാത്തവരെ ഇന്ത്യയിലേക്ക് തിരികെയെത്തിക്കും. മറ്റുള്ളവരെ ഇറ്റലിയിൽ തന്നെ ചികിത്സിക്കാനുള്ള സംവിധാനം ഏർപ്പെടുത്തും. രോഗബാധയില്ല എന്ന സർട്ടിഫിക്കറ്റ് നൽകാൻ ഇറ്റലിയിലെ ഡോക്ടർമാർ തയ്യാറാവാത്ത സാഹചര്യം ഉണ്ട്. അതിനാലാണ് ഇന്ത്യയിൽനിന്നും പ്രത്യേക മെഡിക്കൽ സംഘത്തെ അയക്കുന്നത്.
രോഗബാധയുള്ളവരെയും ഇല്ലാത്തവരെയും ഒരു വിമാനത്തിൽ കൊണ്ടുവരുന്നത് പ്രായോഗികമല്ല. കോവിഡ് 19 പശ്ചാത്തലത്തിൽ വിദേശകര്യ മന്ത്രാലയം ഒന്നും ചെയ്യുന്നില്ല എന്ന വാദം തെറ്റാണ് എന്നും വി മുരളീധരൻ പറഞ്ഞു. ഇറാനിൽ നിന്നുമുള്ള ഇന്ത്യക്കാരെ തിരികെ എത്തിച്ചത് ഉൾപ്പടെ നിരവധി ഇടപെടലുകൾ നടത്തിയിട്ടുണ്ട് എന്നാൽ ഇത് ദിവസവും മാധ്യമങ്ങളിൽ വാർത്തയാക്കുന്ന പതിവ് മന്ത്രാലയത്തിന് ഇല്ലെന്നും കേന്ദ്ര വിദേശകാര്യ സഹമന്ത്രി പറഞ്ഞു.