സമൂഹമാധ്യമങ്ങളില്‍ ചര്‍ച്ചയായി സിനിമാതാരവും തൃശൂര്‍ എം പിയുമായ സുരേഷ് ഗോപിയുടെ പുതിയ ലുക്ക്. താടി വടിച്ച് പുതിയ ഗെറ്റപ്പിലുള്ള ചിത്രമാണ് സുരേഷ് ഗോപി തന്റെ ഇന്‍സ്റ്റഗ്രാം അക്കൗണ്ടില്‍ പങ്കുവെച്ചത്. ഏറെ കാലമായി താടിവെച്ചാണ് സുരേഷ് ഗോപി പൊതുചടങ്ങുകളിലെല്ലാം എത്തിയിരുന്നത്. ഒറ്റക്കൊമ്പന്‍ എന്ന സിനിമയ്ക്ക് വേണ്ടിയായിരുന്നു സുരേഷ് ഗോപി താടി വളര്‍ത്തിയിരുന്നത്. താടി വടിച്ചതോടെ സിനിമ ഉപേക്ഷിച്ചോ എന്ന സംശയമാണ് ആരാധകര്‍ക്കുള്ളത്.
നേരത്തെ തൃശൂര്‍ എം പിയായി വിജയിച്ചതിന് പിന്നാലെ സിനിമയില്‍ അഭിനയിക്കാനായി കേന്ദ്രത്തില്‍ നിന്നും അനുവാദം ആവശ്യമുണ്ടെന്ന് സുരേഷ് ഗോപി പറഞ്ഞിരുന്നു. അനുവാദം ലഭിക്കാത്തതിനെ തുടര്‍ന്ന് സിനിമ ഉപേക്ഷിച്ചെന്നും അതിനാലാണ് സുരേഷ് ഗോപി താടിവടിച്ചതെന്നുമാണ് സോഷ്യല്‍ മീഡിയ പറയുന്നത്. എം പി എന്ന സ്ഥാനത്തിന് പുറമെ കേന്ദ്രമന്ത്രി സ്ഥാനവും സുരേഷ് ഗോപിക്കുണ്ട്. കേന്ദ്ര- സംസ്ഥാന മന്ത്രിസ്ഥാനങ്ങളില്‍ ഉള്ളവര്‍ക്ക് മറ്റ് ജോലികള്‍ ചെയ്യാന്‍ നിയമം അനുശാസിക്കുന്ന പെരുമാറ്റച്ചട്ടപ്രകാരം സാധ്യമല്ലെന്നാണ് ലഭ്യമാകുന്ന വിവരം.
പെരുമാറ്റചട്ടം ഈ പ്രകാരമാണെങ്കിലും താന്‍ സിനിമ ചെയ്യുമെന്നും ഇതിനായി കേന്ദ്രത്തിനോട് അനുവാദം ചോദിച്ചിട്ടുണ്ടെന്നുമായിരുന്നു സുരേഷ് ഗോപി മാധ്യമങ്ങളോട് പറഞ്ഞിരുന്നത്. എത്ര സിനിമകള്‍ ചെയ്യാനുണ്ടെന്ന് അമിത് ഷാ ചോദിച്ചപ്പോള്‍ ഒരു 22 എണ്ണമെങ്കിലും ഉണ്ടെന്നാണ് താന്‍ മറുപടി നല്‍കിയതെന്നും ഇത് കേട്ട് അമിത് ഷാ അപേക്ഷ അങ്ങനെ തന്നെ വലിച്ചെറിഞ്ഞെന്നും സുരേഷ് ഗോപി പറഞ്ഞിരുന്നു.
മാത്യൂ തോമസ് സംവിധാനം നിര്‍വഹിക്കുന്ന സിനിമയായ ഒറ്റക്കൊമ്പന്‍ 2020ല്‍ പ്രഖ്യാപിച്ച സിനിമയാണ്. സുരേഷ് ഗോപിയുടെ 250മത്തെ സിനിമയെന്ന രീതിയില്‍ സിനിമയ്ക്ക് വലിയ പ്രചാരണവും ലഭിച്ചിരുന്നു. സുരേഷ് ഗോപിയെ കൂടാതെ ബിജു മേനോന്‍, മുകേഷ്, വിജയരാഘവന്‍,രഞ്ജി പണിക്കര്‍, ജോണി ആന്റണി തുടങ്ങി വലിയ താരനിരയാണ് സിനിമയില്‍ ഉണ്ടായിരുന്നത്. തെലുങ്ക് താരമായിരുന്ന അനുഷ്‌ക ഷെട്ടിയെയാണ് സിനിമയില്‍ നായികയായി പരിഗണിച്ചിരുന്നത്.