ഫഹദ് ഫാസിലിനെ പോലൊരു നടനെ താന്‍ കണ്ടിട്ടില്ലെന്ന് സൂപ്പര്‍ സ്റ്റാര്‍ രജനീകാന്ത്. താരത്തിന്റേതായി പുറത്തിറങ്ങാനിരിക്കുന്ന വേട്ടയ്യന്റെ ഓഡിയോ ലോഞ്ചില്‍ സംസാരിക്കവെയാണ് ഫഹദ് ഫാസിലിനെ കുറിച്ച് ഇക്കാര്യങ്ങള്‍ പറഞ്ഞത്. വേട്ടയ്യനില്‍ ഒരു എന്റര്‍ടെയ്‌നര്‍ ക്യാരക്ടറാണ് ഫഹദ് ഫാസില്‍ ചെയ്യുന്നത്. ഈ കഥാപാത്രം ഫഹദ് ഫാസില്‍ ചെയ്താല്‍ മാത്രമേ ശരിയാകുവെന്നും അദ്ദേഹത്തെ ഈ സിനിമയിലേക്ക് കൊണ്ടുവരണമെന്നുമായിരുന്നു അണിയറ പ്രവര്‍ത്തകര്‍ പറഞ്ഞത്. അദ്ദേഹത്തിന്റെ അധികം സിനിമകളൊന്നും ഞാന്‍ കണ്ടിട്ടില്ല, വിക്രം, മാമന്നന്‍ എന്നീ ചിത്രങ്ങളാണ് കണ്ടിട്ടുള്ളത്. ഈ സിനിമകളില്‍ വില്ലന്‍ സ്വഭാവമാണ് അദ്ദേഹം ചെയ്യുന്നത്. ഇക്കാര്യം അണിയറപ്രവര്‍ത്തകരോട് ഞാന്‍ പങ്കുവച്ചു.
എന്നാല്‍, സാര്‍ അയാളുടെ മലയാളസിനിമകള്‍ കാണണം, സൂപ്പര്‍ ആര്‍ട്ടിസ്റ്റാണെന്നായിരുന്നു അണിയറ പ്രവര്‍ത്തകര്‍ നല്‍കിയ മറുപടി. അത് ശരിയാണെന്ന് എനിക്ക് മനസ്സിലായി. ഇതുപോലൊരു നാച്ചുറല്‍ ആര്‍ട്ടിസ്റ്റിനെ കാണാന്‍ കഴിയില്ലെന്നും താന്‍ കണ്ടിട്ടില്ലെന്നും രജനികാന്ത് പറഞ്ഞു.
