നിര്‍മ്മാണ ചിലവിനേക്കാള്‍ വലിയ തുക നല്‍കി മലയാള സിനിമകള്‍ വാങ്ങുവാന്‍ ഒ.ടിടി ഫ്‌ലാറ്റ്‌ഫോമുകള്‍ നിരന്നു നിന്നൊരു കാലം ഉണ്ടായിരുന്നു. കോവിഡ് കാലത്തായിരുന്നു ഓവര്‍ ദി ടോപ്പ് പ്ലാറ്റ്‌ഫോമുകള്‍ മലയാളത്തിലേക്ക് കൂടുതല്‍ കടന്നുവന്നത്. പ്രതിസന്ധികാലത്ത് രക്ഷകനായി എത്തിയ ഇക്കൂട്ടര്‍ ചെറിയ മുതല്‍ മുടക്കിലുള്ള സിനിമകള്‍ക്ക് വന്‍ ലാഭം നിര്‍മാതാക്കള്‍ക്ക് ഉണ്ടാക്കിക്കൊടുത്തു.
പിന്നെ ഒ.ടിടി ഫ്‌ലാറ്റ്‌ഫോമുകള്‍ക്ക് വേണ്ട തരത്തിലുള്ള സിനിമകള്‍ തയ്യാറാക്കാനുള്ള നെട്ടോട്ടമായി. തിയേറ്ററുകളില്‍ ഒഴിവാക്കി ഒ.ടിടി റിലീസുകളുടെ കാലമായിരുന്നു പിന്നീട് കണ്ടത്. മോഹന്‍ലാല്‍-ജീത്തു ജോസഫ് കൂട്ടുകെട്ടില്‍ പുറത്തിറങ്ങിയ ദൃശ്യം 2 വന്‍ തുകയ്ക്ക് വിറ്റുപോയി. 30 കോടിയോളം രൂപയ്ക്കാണ് കച്ചവടം. ദിലീപിന്റെ കേശു ഈ വീടിന്റെ നാഥന്‍ 25 കോടിയോളം രൂപയ്ക്ക് വാങ്ങുവാനായി ഒ.ടിടിക്കാര്‍ ഉണ്ടായിരുന്നു.
