ഇന്ത്യന്‍ സിനിമ പ്രേമികള്‍ ഏറെ ആകാംക്ഷയോടെ കാത്തിരിക്കുന്ന സിനിമയാണ് അല്ലു അര്‍ജുന്‍ നായകനാവുന്ന പുഷ്പ 2. സുകുമാര്‍ സംവിധാനം ചെയ്ത സിനിമയുടെ ആദ്യ ഭാഗത്തിന് മികച്ച പ്രതികരണമാണ് ഇന്ത്യയില്‍ എല്ലായിടത്തും ലഭിച്ചത്. അതിനാല്‍ തന്നെ പുഷ്പ 2വിന്റെ അപ്‌ഡേറ്റുകള്‍ വാര്‍ത്തകളില്‍ ഇടം പിടിക്കാറുണ്ട്. ഇപ്പോഴിതാ സിനിമയെ പറ്റി പുതിയൊരു അപ്‌ഡേറ്റ് കൂടി വന്നിരിക്കുകയാണ്.
പുഷ്പ ഒന്നാം ഭാഗത്തില്‍ അല്ലുവിനൊപ്പം സാമന്ത ചെയ്ത ഐറ്റം നമ്പര്‍ ഊ ആണ്ടവാ മാമ വലിയ ശ്രദ്ധ നേടിയിരുന്നു. രണ്ടാം ഭാഗത്തിലും ഇതുപോലെ ഒരു ഐറ്റം നമ്പര്‍ സിനിമയിലുണ്ടാകുമെന്നാണ് വ്യക്തമാകുന്നത്. തെലുങ്കില്‍ ശ്രദ്ധേയയായ ശ്രീലീലയാകും അല്ലുവിനൊപ്പം ഐറ്റം നമ്പറിലുണ്ടാവുക എന്നതാണ് പുതിയ റിപ്പോര്‍ട്ട്. നേരത്തെ ഗുണ്ടൂര്‍ കാരം എന്ന സിനിമയിലെ കുര്‍ച്ചി മടത്തപ്പെട്ടി എന്ന ഗാനത്തിലൂടെ ശ്രദ്ധ നേടിയ നായികയാണ് ശ്രീലീല.