മരക്കാര്‍ അറബിക്കടലിന്റെ സിംഹം ഉടന്‍ 300 കോടി ക്ലബില്‍ എത്തുമെന്ന് നിര്‍മാതാവ് ആന്റണി പെരുമ്പാവൂര്‍. ഇന്ന് റിലീസ് ചെയ്ത സിനിമയ്ക്ക് തിയറ്ററുകളില്‍ ഗംഭീര സ്വീകരണമാണ് ലഭിച്ചുകൊണ്ടിരിക്കുന്നത്. അര്‍ധരാത്രി 12 മുതല്‍ ഫാന്‍സ് ഷോ ഉണ്ടായിരുന്നു. ഇപ്പോഴത്തെ ഈ പോക്ക് പോയാല്‍ സിനിമ ഉടന്‍ 300 കോടി കളക്ഷന്‍ നേടുമെന്ന് ആന്റണി പെരുമ്പാവൂര്‍ പറഞ്ഞു. മരക്കാറിന് കിട്ടികൊണ്ടിരിക്കുന്ന ആരവവും ബഹളവുമെല്ലാം നേരത്തെ മനസില്‍ കണ്ടതാണെന്നും ആന്റണി പറഞ്ഞു. 'നമ്മള്‍ മനസില്‍ കണ്ട കാര്യം നേരില്‍ സംഭവിക്കുന്നതിന്റെ സന്തോഷം ഉണ്ട്. ഈയൊരു ആവേശം നില നിന്നാല്‍ പത്ത് പതിനഞ്ച് ദിവസത്തിനുള്ളില്‍ മരക്കാര്‍ അറബിക്കടലിന്റെ സിംഹം 300 കോടി ക്ലബില്‍ ഇടം നേടുമെന്നാണ് പ്രതീക്ഷിക്കുന്നത്,' സിനിമ കണ്ട ശേഷം ആന്റണി പറഞ്ഞു.
