തനിക്ക് പ്രണയിക്കാന്‍ മോഹമുണ്ടെന്ന് യുവനടി അര്‍ച്ചന കവി. ഒരാളോടും ഇതുവരെ പ്രണയം തോന്നിയിട്ടില്ലെന്നും എന്നാല്‍ റൊമാന്‍റിക് മൂവീസും റൊമാന്‍റിക് സോംഗുകളും ഇഷ്ടമാണെന്നും അര്‍ച്ചന കവി പറഞ്ഞു. ഒരു ചലച്ചിത്രവാരികയ്ക്ക് അനുവദിച്ച അഭിമുഖത്തിലാണ് അര്‍ച്ചന ഇങ്ങനെ പറഞ്ഞത്.
“അഞ്ചാറു വര്‍ഷം കഴിഞ്ഞേ എനിക്ക് വിവാഹമുണ്ടാവുകയുള്ളൂ. വരുന്ന മെയിലുകളിലൊക്കെ ഒട്ടേറെ പ്രൊപ്പോസല്‍‌സ് വരാറുണ്ട്. അവരുടെ പ്രൊഫൈലൊക്കെ ഗംഭീരമായി കൊടുത്തിട്ടുണ്ടാവും. എന്നാല്‍ അവസാനം ഒരു കണ്ടീഷനും ഉണ്ടാകും - വിവാഹം കഴിഞ്ഞാല്‍ സിനിമ വിടണമെന്ന്. സിനിമയില്‍ വന്നതിന് ശേഷമല്ലേ എന്നെ അവര്‍ ഇഷ്ടപ്പെട്ടു തുടങ്ങിയത്. എന്‍റെ കരിയറിനെ റെസ്പെക്ട് ചെയ്യാത്തവര്‍ എന്നെ എങ്ങനെ റെസ്പെക്ട് ചെയ്യും. സിനിമയെ മോശമായി ചിത്രീകരിക്കുന്ന ഒരാളെ ലൈഫ് പാര്‍ട്ണര്‍ ആക്കാന്‍ എനിക്ക് സാധിക്കില്ല” - അര്‍ച്ചന വ്യക്തമാക്കുന്നു.
നീലത്താമരയിലെ കുഞ്ഞിമാളു എന്ന കഥാപാത്രത്തെ അവതരിപ്പിച്ച് അഭിനയരംഗത്തെത്തിയ അര്‍ച്ചന മമ്മി ആന്‍റ് മിയിലെ ജ്യുവല്‍ എന്ന കഥാപാത്രത്തിലൂടെ പ്രേക്ഷകര്‍ക്ക് കൂടുതല്‍ പ്രിയങ്കരിയായി. ഇപ്പോള്‍ ബെസ്റ്റ് ഓഫ് ലക്ക് എന്ന ചിത്രത്തില്‍ അഭിനയിച്ചുവരികയാണ് അര്‍ച്ചന കവി.
“കുഞ്ഞിമാളുവിന്‍റെയും ജ്യുവലിന്‍റെയും ഇടയിലുള്ള ഒരു സ്വഭാവമാണ് എനിക്ക്. കുഞ്ഞിമാളു ജീന്‍സും ടോപ്പുമിട്ടാല്‍ അര്‍ച്ചന കവിയായി. ഞാന്‍ എല്ലാം തുറന്നടിച്ചു പറയും. ആരെയെങ്കിലും വേദനിപ്പിച്ചാല്‍ സോറി പറയാനും മടിയില്ല” - അര്‍ച്ചന പറയുന്നു.